მარტვილის პოლიციაში მედიის წარმომადგენლები და სასულიერო პირები გუშინ ჭყონდიდის ეპარქიაში მომხდარ ინციდენტთან დაკავშირებით იკითხებიან. გამოკითხვაზე უკვე შევიდნენ “მთავარი არხის” ოპერატორი ზვიად აბლოთია და წაჩხურუს ტაძრის წინამძღვარი მამა ბასილი. ასევე დღეს გამოიკითხებიან “მთავარი არხის” რეგიონული კორესპოდენტი ემა გოგოხია და “თაიმერის” ჟურნალისტი აკო ქიქავა. შეგახსენებთ,ჭყონდიდის ეპარქიაში, 8 მარტს, მრევლის ნაწილს და ახალ მიტროპოლიტ სტეფანეს შორის დაპირისპირება მოჰყვა ახლადდანიშნული მიტროპოლიტის ბრძანებას, რომლის თანახმადაც, ორ დიაკვანს უფლებამოსილება შეუჩერა დაუმორჩილებლობის გამო. მათი თქმით, ეს გადაწყვეტილება უსამართლოა. დაპირისპირებისას, აივნის მოაჯირი ჩამოვარდა და რამდენიმე ადამიანი გადავარდა. დაშავდნენ ჟურნალისტები და ოპერატორები. მომხდარ ფაქტზე გამოძიება დაიწყო. ჯერჯერობით უცნობია დაიბარებენ თუ არა გამოკითხვაზე მარტვილის ახლადდანიშნულ მიტროპოლიტ სტეფანეს.