“ნაციონალური მოძრაობის” ინფორმაციით, “ევროპის სახალხო პარტიის” ფრაქციის თავმჯდომარე მანფრედ ვებერი საქართველოს პრემიერ-მინისტრ ირაკლი ღარიბაშვილს წერილს უგზავნის.
როგორც “ნაციონალურ მოძრაობაში” განმარტავენ, საქართველოს მთავრობის მეთაურისადმი გაგზავნილი წერილი “ევროპის სახალხო პარტიამ”, რომლის წევრიც თავადაც არიან, მათაც მიაწოდა.
“ნაციონალური მოძრაობის” მტკიცებით, წერილში მანფრედ ვებერი საქართველოს ყოფილი ხელისუფლების მაღალჩინოსნების, მათ შორის დედაქალაქის ყოფილი მერის, გიგი უგულავას საქმეებზე საუბრობს და განმარტავს, რომ “ჩვეულებრივ პრაქტიკად იქცა პოლიტიკური ლიდერებისა და ფიგურების მიმართ შერჩევითი სამართალი”. “ევროპის სახალხო პარტიის” ფრაქციის თავმჯდომარე ირაკლი ღარიბაშვილს შეახსენებს, რომ მსგავსი ქმედებები დააზიანებს საქართველოს საერთაშორისო იმიჯს.
