პარლამენტის თავმჯდომარის განცხადებას, რომ საქართველოს პრეზიდენტი მართავს კონსულტაციებს პოლიტიკურ პარტიებსა და არასამთავრობო ორგანიზაციებთან, რათა მათ საკონსტიტუციო კომისია დატოვონ, ახალგზარდა იურისტთა ასოციაციის თავმჯდომარე ეხმაურება.ანა ნაცვლიშვილი პრეზიდენტსა და ადმინისტრაციის რომელიმე წარმომადგენელთან აღნიშნული შინაარსის კონსულტაციებს არ ადასტურებს.მისი თქმით, პარლამენტის თავმჯდომარის განცხადება არასწორია და ის აზიანებს საკონსტიტუციო კომისიის მუშაობის პროცესს.
„ჩვენთან ასეთი კონსულტაციები არ ყოფილა და დარწმუნებით შემიძლია ვთქვა, რომ პარტნიორ ორგანიზაციებთან რომ ყოფილიყო, აუცილებლად მეცოდინებოდა. ამ ტიპის კონსულტაციების შესახებ არც არაფერი მსმენია, მით უფრო არ ყოფილა მსგავსი საუბრები პრეზიდენტთან ან მის წარმომადგენლებთან. ამიტომ მგონია, რომ ეს არის არაზუსტი და ძალიან დამაზიანებელი ინფორმაცია ზოგადად პროცესისთვის. თუ არასამთავრობო ორგანიზაციები რაიმე ტიპის გადაწყვეტილებას იღებენ, იღებდნენ და მიიღებენ, როგორც კონსტიტუციასთან, ასევე სხვა საკითხებთან დკავშირებით, ეს არის არასამთავრობო ორგანიზაციების პოზიცია და არ არის საჭირო ვინმესთან მიბმა ჩვენი გადაწყვეტილების მიღების პროცესის,“ – განაცხადა ანა ნაცვლიშვილმა.