ზუგდიდის იუსტიციის სახლთან იმ მოქალაქეებს, რომელთაც დოკუმენტაციის მოგვარება სურთ საათობით უწევთ რიგში დგომა. მოქალაქეების თქმით,  ხუთი ნოტარიუსის ნაცვლად  ერთი მუშაობს, რის გამოც საგანგებო სიტუაციების დროს საბუთების მოწესრიგებას ვერ ახერხებენ, ახლა  კი მსურველთა რაოდენობამ მოიმატა, ამიტომაც ნოტარიუსების შეზღუდული რაოდენობა, მსურველთა გაზრდილ ნაკადს  ვერ უმკლავდება. ამასთანავე მათი თქმით, შეცდომები თავად იუსტიციის სახლის ვებ გვერდზეც ფიქსირდება.

იუსტიციის სახლის ფილიალებში სერვისების მისაღებად საჭირო დაჯავშნის ელექტრონული სისტემა პანდემიის გამო ამოქმედდა. განსხვავებული წესი მოქმედებს 70 წლისა და მეტი ასაკის პირებისთვის, ასევე, მათთვის, ვისაც ჯანმრთელობის მდგომარეობის გამო გადაადგილება არ შეუძლია. ისინი მთელ რიგ სერვისებზე განაცხადის გაკეთებას (მათ შორის, როცა პირველად იღებენ დოკუმენტს) სახლიდან გაუსვლელად  შეძლებენ, მათ შორის ისეთ მოთხოვნად სერვისებზე, როგორებიცაა: პირადობის მოწმობა, პასპორტი, ქონების რეგისტრაცია და სხვა, ამისათვის მოქალაქემ უნდა დარეკოს იუსტიციის სახლის ცხელ ხაზზე 2 405-405 და ინფორმაცია მიაწოდოს ოპერატორს, რის შემდეგაც ჯანდაცვის მსოფლიო ორგანიზაციის რეკომენდაციების შესაბამისად ეკიპირებული სააგენტოს თანამშრომლები განაცხადის მისაღებად და საჭირო პროცედურების განსახორციელებლად დაინტერესებულ პირს 10 დღის ვადაში მის მიერ მითითებულ მისამართზე მიაკითხავენ. აღნიშნული კატეგორიის პირებისთვის ეს მომსახურება უფასოა, მზა დოკუმენტს კი, მოქალაქეები ფოსტით მიიღებენ.