ინფიცირებული მძღოლის კლასტერი და კონტაქტების წრე კიდევ უფრო ფართოვდება. ეპიდემიოლოგები კონტაქტებს რამდენიმე რეგიონში იკვლევენ, მათ შორის, ახალი კონტაქტები გამოიკვეთა ჩხოროწყუს მუნიციპალიტეტში და ისინი ანაკლიის საკარანტინო ზონაში გადაჰყავთ. ზუგდიდის საზოგადოებრივი ჯანდაცვის ცენტრის ხელმძღვანელის ნანა ოდიშარიას ინფორმაციით, ეპიდემიოლოგები ვარაუდობენ, რომ ზუგდიდელი ტრაილერის მძღოლი მარნეულში დაინფიცირდა, რადგან იქ დაუცველ კონტაქტს ასახელებს.
სულ, ამ დროისთვის, მძღოლის კლასტერის 7 წევრია დაინფიცირებული, მათ შორისაა ასაკოვანი დედა, რომლის ჯანმრთელობის მდგომარეობა ექიმის ინფორმაციით, საყურადღებოა, ასევე ინფიცირებულია ახალგაზრდა მამაკაცის ორი არასრულწლოვანი შვილი და სამი ახლო ნათესავი – ცოლ-ქმარი და მათი მცირეწლოვანი ბავშვი.
ინფიცირებული მამაკაცი რუხიდან თბილისის ინფექციურ საავადმყოფოშია გადაყვანილი, სხვები კი რუხის კლინიკაში მკურნალობენ.