ახალგაზრდა ფერმერი, 24 წლის ფერმერი მარიამ ქობალია, ე.წ საზღვრის სიახლოვეს,ზუგდიდის მუნიციპალიტეტის სოფელ დარჩელში ცხოვრობს. მას ვარდების სათბური აქვს გაშენებული და პანდემიის გამო შექმნილი მდგომარეობიდან გამომდინარე რეალიზებას ვერ ახერხებს. როგორც მარიამმა ჩვენთან საუბარში განმარტა, ყვავილების მოშენება ერთი წლის წინ დაიწყო, კერძოდ, სხვადასხვა სახეობის უეკლო ჯიშის ვარდების. მისი თქმით, ეს ერთგვარი ოჯახური ბიზნესია, სადაც ყველაზე მეტად მამა ეხმარება, მარიამის განმარტებით, პანდემიის გავრცელებამდე ყოველთვიური შემოსავალი 1000 ლარამდე ქონდა. რაც შეეხება სარეალიზაციო ბაზარს, დამწყები მეწარმე ყვავილებს ადგილზე სოფელში ყიდდა, თუმცა ძირითადად მაინც ზუგდიდის ბაზარში და ასევე რამდენიმე მაღაზიას აბარებდა. დღეს მარიამს ყვავილების გაყიდვაში სოფელში მცხოვრები მოსახლეობა ეხმარება და მას ასევე განაპირა სოფლებიდანაც უკავშირდებიან.