ახალმა კორონა ვირუსმა და პანდემიამ თითქმის ყველა ადამიანის ყოველდღიურობა მნიშვნელოვნად და ძირეულად შეცვალა. აქედან გამომდინარე, არასამთავრობო ორგანიზაციები ძირითადად დისტანციური და ონლაინ რეჟიმის ფორმატში მუშაობენ. ასოციაცია „იმედი-დევნილ ქალთა მოძრაობა მშვიდობისათვის“ ხელმძღვანელი ქრისტინა კილანავა როგორც ჩვენთან საუბარში განმარტავს, მათი ორგანიზაციაც პანდემიის პერიოდში ყოველდღე მუშაობას აღნიშნულ ფორმატში აგრძელებს. მისი თქმით, ბოლო ორი თვის მანძილზე შექმნილი მძიმე ვითარებიდან გამომდინარე, მათი ორგანიზაცია ცდილობს დევნილი მოსახლეობისთვის არსებული პრობლემების გარკვეულწილად მოგვარებას. თურქეთის თანამშრომლობისა და კოორდინაციის სააგენტოსა და მიგრაციის საერთაშორისო კომიტეტთან ერთად ასოციაცია „იმედი“ ამ ეტაპზე ახალ პროექტს ახორციელებს, სადაც თავად დევნილი ქალები არიან ჩართულები და ასევე ზუგდიდის რამდენიმე სოფელში მცხოვრებ დევნილ მოსახლეობას პანდემიის დროს საჭირო სპეციალური სამედიცინო ნიღბები და სადეზინფექციო ხსნარები ურიგდებათ. ქრისტინე კილანავას განმარტებითვე, ამ დროს, როცა ყველანი უმწვავესი გამოწვევების წინაშე ვიმყოფებით, საჭიროა უფრო მეტად კოორდინირებული მუშაობა, არსებული პრობლემების დასაძლევად.