ზუგდიდში მდებარე, საოჯახო სასტუმრო „თბილი სახლი“-ს მფლობელი მაკა კორკელია მეხუთე წელია აღნიშნული მცირე ბიზნეს საქმიანობითაა დაკავებული. წარმატებული მეწარმე ქალი ამბობს, რომ თებერვლის ბოლო რიცხვებიდან, როგორც კი ქვეყანა და მთელი მსოფლიოში ახალი კორონავირუსის საფრთხემ მოიცვა, მის სასტუმროში ყველა ჯავშანი გაუქმდა. თვენახევარზე მეტია, „თბილი სახლის“ კარები დაკეტილია და, ჯერჯერობით, დამაიმედებელი პროგნოზის გაკეთება უჭირთ ჯანდაცვის სფეროს წარმომადგენლებს. მათი განმარტებით, კორონავირუსის გავრცელების პიკს, აპრილის ბოლოს -მაისის დასაწყისში უნდა ველოდოთ. ამ პერიოდში შექმნილ სიტუაციაზე და არსებულ პრობლემებზე საუბრობს მაკა კორკელია, მისი თქმით, ასე თუ რამდენიმე თვე გაგრძელდება, მის საოჯახო ბიზნესს, საფრთხე შეექმნება. „თბილ სახლში“ შექმნილი მყუდრო გარემო, კომფორტული ოთახები და ლამაზი ბაღი, სტუმრებს ყოველთვის კმაყოფილს ტოვებდა. აქ მსოფლიოს მრავალი ქვეყნიდან ჩამოსულ სტუმრებს განსაკუთრებით, როგორც გარემო, ასევე სტუმართმოყვარეობა და მეგრული სამზარეულო იზიდავდა. როგორც მაკა ამბობს, თვეში დაახლოებით 100-მდე სტუმარს ღებულობდა, დღეს სურათი რადიკალურად შეცვლილია და სასტუმროს კარები დაკეტილი. მაკას მსგავსად, იდენტური მდგომარეობაა დანარჩენ საოჯახო სასტუმროებშიც.