ხმაური იყო დღეს ზუგდიდის რაიონული სასამართლოსთან. ყოფილი მეუღლის მიმართ ძალადობაში ბრალდებული დავით ჟორჟოლიანის ოჯახის წევრები ქალთა მოძრაობის იმ წევრებს დაუპირისპირდნენ, რომლებმაც სოლიდარობა დაზარალებულ მარიამ ხოჯავას გამოუცხადეს. ჟორჟოლიანების გაღიზიანება სწორედ ამ ფაქტმა გამოიწვია. სიტუაციის გასაკონტროლებლად სამართალდამცავების მობილიზაციაც გახდა საჭირო, რომლებმაც დაპირისპირებულ მხარეებს ფიზიკური შეხლა-შემოხლის საშუალება არ მისცეს. ქალთა მოძრაობის წევრის ბაია პატარაიას განცხადებით, ისინი მხარს უჭერენ მარიამ ხოჯავას ოჯახს, რომელიც გახდა ძალადობის მსხვერპლი მისი მეუღლის ოჯახის მხრიდან. მისივე თქმით, დღემდე ხორციელდება ამ ოჯახზე ფსიქოლოგიური ზეწოლა და ძალადობა. ბაია პატარაია ამბობს, რომ ქალების უფლებები ხშირად ირღვევა საქართველოში, მისი თქმით, ქვეყანაში არ არსებობს სქესობრივი განათლება და გაუნათლებლობა ზოგადად იწვევს ძალადობას. „ჩვენ სრულ მხარდაჭერას ვუცხადებთ მარიამ ხოჯავას, რადგან შევძლოთ პრევენცია მოვახდინოთ იმის, თუ რაც ხდება საქართველოში, როდესაც ძალადობენ ქალზე“ – ამბობს ქალთა მოძრაობის ხელმძღვანელი ნინო დანელია. ბრალდებულის დავით ჟორჟოლიანის და, ნესტან ჟორჟოლიანი საქმეში გენერალური პროკურატურის ჩართვას ითხოვს, რათა საქმეს მიეცეს სწორი მსვლელობა და რეალური დამნაშავე იქნას გამოვლენილი. მისი თქმით, დავით ჟორჟოლიანი უდანაშაულოა.
დავით ჟორჟოლიანის ამჟამად წინასწარ პატიმრობაში იმყოფება, მას მეუღლის ცემა და მისი გაუპატიურება ედება ბრალად. მის წინააღმდეგ საქმე აღძრულია სსსკ 121-ე და 138-ე მუხლით. (ძალადობა და სექსუალური ხასიათის ძალმომრეობითი მოქმედება გაუკუღმართებული ფორმით) ბრალის დამტკიცების შემთხვევაში ჟორჟოლიანს ექვსიდან რვა წლამდე თავისუფლების აღკვეთა ემუქრება.
ავტორი: ლევან კალანდია