ოკუპირებული ახალგორი უკვე 114 დღეა ჩაკეტილი და მოსახლეობას ე.წ რეაზდახანის გამშვები პუნქტიდან საქართველოს ცენტრალური ხელისუფლების მიერ კონტროლირებად ტერიტორიაზე არ უშვებენ. ბოლო 4 თვის განმავლობაში ჩაკეტილი პოსტი 4-ჯერ გაიხსნა და ყველა ეს შემთხვევა მიცვალებულების გადასვენებას უკავშირდებოდა. საოკუპაციო რეჟიმს ფაქტობრივ ტყვეობაში ჰყავს საქართველოს დაახლოებით 1500-მდე მოქალაქე. რეგიონში მედიკამენტებისა და პროდუქტის მწვავე უკმარისობაა და მოსახლეობა ჰუმანიტარული კატასტროფის წინაშეა.
ცხინვალის საოკუპაციო რეჟიმის ე.წ. პრეზიდენტი ბიბილოვი ამ ვითარებაში საქართველოს ულტიმატუმს , რომ უყენებს და აცხადებს, რომ ახალგორი იმ დრომდე იქნება ჩაკეტილი, ვიდრე სოფელ წნელისთან ქართული პოლიცია პოსტს არ აიღებს.
შალვა ნათელაშვილი ოკუპირებული ახალგორის რაიონში შექმნილ ვითარებაზე გაეროს უშიშროების საბჭოსგან რეაგირებას და სეპარატისტული ხელისუფლების მიმართ სანქციების დაწესებას ითხოვს.
“მივმართავ გაეროს უშიშროების საბჭოს მუდმივ და არამუდმივ წევრებს, სასწრაფოდ, რიგგარეშე სხდომაზე განიხილეთ შექმნილი კატასტროფულ-ტრაგიკული ვითარება. დააწესეთ სასწრაფო სანქციები სეპარატისტ თვითმარქვია ბიბილოვის ადმინისტრაციასა და პირადად მის მიმართ, რათა ისინი ვერ გასცდნენ ჯავის რაიონსა და იმ გვირაბს, საიდანაც შემოძვრნენ. სხვა შემთხვევაში მოსახლეობას ემუქრება ფიზიკური მოსპობა,” – აცხადებს “ლეიბორისტების” ლიდერი შალვა ნათელაშვილი.