თურქეთში დაღუპული ქართველი მეზღვაურის 23 წლის ქუთაისელი თორნიკე ქავთარაძის ცხედარი საქართველოში გადმოასვენეს. სარფში გარდაცვლილის ოჯახის წევრები და ახლობლები იყვნენ შეკრებილნი.
სარფის საბაჟოზე ასევე იმყოფებოდა კომპანიის წარმომადგენელი, რომელმაც ოჯახს ექსპერტიზის დასკვნა გააცნო, მაგრამ ოჯახმა ეს დასკვნა არასარწმუნოდ მიაჩნია და ცხედრის ხელახალი ექსპერტიზის ჩატარებას მოითხოვს.
გარდაცვლილის ახლობლებს არ სჯერათ ოფიციალური ვერსიის, რომ გარდაცვალების ფაქტი დადგა იმის შედეგად, რომ მას ფეხი დაუცურდა, მეტრნახევრის სიმაღლიდან ჩამოვარდა და წყალში ჩავარდა. ,, ჩვენ გვაინტერესებს დეტალები, რა დროს, როგორ მოხდა, უსაფრთხოების ზომები დაცული იყო თუ არა, მუშაობის დროს დამცავი საშუალებები უნდა ჰქონოდა, უსაფრთხოების ზომები უნდა ყოფილიყო დაცული“, – აღნიშნავს გარდაცვლილის ბიძაშვილი იაკობ ბუხაიძე.
უბედური შემთხვევა 21 ოქტომბერს ქალაქ ისკანდერუმთან პანამის დროშის ქვეშ მცურავ თურქულ გემზე მოხდა. 23 წლის ახალგაზრდა გემზე პირველად იმყოფებოდა.