მოსკოვში თურქეთის საელჩო დაარბიეს. დიპლომატიურ წარმომადგენლობასთან ათობით ადამიანი შეიკრიბა და შენობას ქვები, კვერცხები და პომიდვრები დაუშინა. მომიტინგეებმა ამ ფორმით თურქეთის მიერ რუსული ბომბდამშენის ჩამოგადება გააპროტესტეს. ინცინდენტის გამო მოსკოვი ანკარას საპასუხო ნაბიჯებით ემუქრება.   

რუსეთის პირველმა დიპლომატმა სუ 24–ის ჩამოგდებას დაგეგმილი პროვოკაცია უწოდა და აღნიშნა, რომ რუსეთი თურქეთთან ომს არ აპირებს. მიუხედავად ამისა, რუსეთის სამხედრო მეთაურობამ უკვე შეწყვიტა კონტაქტი თურქ კოლეგებთან და რეგიონში საჰაერო თავდაცვითი სისტემების განლაგების გადაწყვეტილება მიიღო.

მომხდარზე რუსეთის პრეზიდენტმა ვლადიმერ პუტინმა კიდევ ერთხელ ისაუბრა და თურქეთი ისლამიზაციის პოლიტიკის მხარდაჭერაში დაადანაშაულა.

„ჩვენც და გარწმუნებთ ბევრი სხვაც ხედავს, რომ თურქეთის ხელისუფლება ბოლო წლებში მიზანმიმართულად აწარმოებს ქვეყნის ისლამიზაციის პოლიტიკას. არ გამოვრიცხავთ მსგავსი ინციდენტების განმეორებას და თუ განმეორდება, რეაგირებას მოვახდენთ. რაც შეეხება ჩვენი საბრძოლო ავიაციის ფრენების უსაფრთხოებას, არსებული ზომები არასაკმარისია, ამიტომ სირიის ბაზაზე განვალაგებთ C 300 ტიპის საჰაერო თავდაცვის სისტემებს. ეს არ იქნება მხოლოდ ერთი საპასუხო ნაბიჯი. საკმაოდ სერიოზულად ვუდგებით იმას, რაც გუშინ მოხდა და ყველა საშუალება იქნება გამოყენებული უსაფრთხოების დასაცავად,“ – აცხადებს ვლადიმერ პუტინი.