9 მაისის აღლუმისთვის კრემლის მხრიდან “ზავის” გამოცხადების შემდეგ, უკრაინის პრეზიდენტმა ვოლოდიმირ ზელენსკიმ დაწერა, რომ 6 მაისის შუაღამიდან დაწყებული უკრაინა ცეცხლის შეწყვეტას გამოაცხადებს.

ზელენსკის თქმით, უკრაინას მოსკოვისგან ჯერ კიდევ არ მიუღია “ოფიციალური მიმართვა,” რომელშიც განსაზღვრული იქნებოდა ცეცხლის შეწყვეტის შეთანხმების პირობები.

“ჩვენ მიგვაჩნია, რომ ადამიანის სიცოცხლე ბევრად უფრო ღირებულია, ვიდრე ნებისმიერი წლისთავის ‘აღნიშვნა’,” წერს უკრაინის პრეზიდენტი.

მან განმარტა, რომ ცეცხლის შეწყვეტა ძალაში 6 მაისის 00:00 საათზე შევა და ეს პერიოდი საკმარისი იქნება, რათა განისაზღვროს, შესაძლებელია თუ არა, რომ საბრძოლო მოქმედებები გულწრფელად შეწყდეს.

“ამ მომენტიდან ჩვენ სარკისებურად ვიმოქმედებთ,” თქვა ზელენსკიმ და დაამატა, რომ დროა, რუსეთმა ომის დასამთავრებლად კონკრეტული ნაბიჯები გადადგას.

მანამდე რუსეთის თავდაცვის სამინისტრომ ცალმხრივად 8-9 მაისისთვის “ზავი” გამოაცხადა და დაიმუქრა, რომ თუკი 9 მაისის აღლუმი “ჩაიშლება,” რუსეთი ცენტრალური კიევის წინააღმდეგ მასშტაბურ სარაკეტო იერიშს წამოიწყებს.