ირანის პარლამენტის თავმჯდომარე, მოჰამედ ბაყერ ყალიბაფი აშშ-ს მხრიდან იერიშის შემთხვევაში ამერიკულ სამხედრო ობიექტებსა და ისრაელზე თავდასხმით დაიმუქრა და პრევენციული ზომების შესაძლებლობა არ გამორიცხა.
ამის შესახებ ყალიფაბმა პარლამენტის სხდომაზე სიტყვით გამოსვლისას ილაპარაკა. ყალიბაფი ისრაელს “ოკუპირებულ ტერიტორიად” მოიხსენიებდა.
“ირანზე თავდასხმის შემთხვევაში, როგორც ოკუპირებული ტერიტორია, ისევე რეგიონში არსებული ყველა ამერიკული სამხედრო ცენტრი, ბაზა და ხომალდი ჩვენი ლეგიტიმური სამიზნე იქნება. ჩვენ თავს არ შევიზღუდავთ მხოლოდ ქმედების შემდგომ საპასუხო რეაგირებით და ვიმოქმედებთ საფრთხის ნებისმიერ ობიექტურ ნიშნებზე დაყრდნობით”. – თქვა ყალიბაფმა.
ამასთან, ყალიბაფმა პოლიცია და ირანის პარამილიტარული რევოლუციური გვარდია “ბასიჯი” შეაქო. მისი თქმით პროტესტის დროს ირანის პოლიციას “მტკიცე პოზიცია უკავია”.
“ირანელმა ხალხმა უნდა იცოდეს, რომ ჩვენ მათ უკიდურესად მკაცრად მოვექცევით და დავსჯით ყველას, ვინც დაკავებულია”. – განაცხადა ყალიბაფმა.
ცნობისთვის, ტრამპი ხამენეის რეჟიმს არაერთხელ დაემუქრა და მთავრობა გააფრთხილა, რომ თუკი დემონსტრანტებს მოკლავდნენ, აშშ საპასუხო ნაბიჯებს გადადგამდა.
“ირანი თავისუფლებას უყურებს, ალბათ ისე, როგორც არასდროს, აშშ მათ გვერდით დგას დასახმარებლად”. – დაწერა ტრამპმა Truth Social-ზე 10 იანვარს.