დღეს პანკისის ხეობაში ზაზა სარალიძე და ზვიად კუპრავა ჩავიდნენ.
ისინი სოფელ დუისში მალხაზ მაჩალიკაშვილის სახლში იმყოფებიან და ოჯახის წევრებთან ერთად სამომავლო გეგმებზე საუბრობენ.
„უნდა დავგეგმოთ როგორი იქნება ჩვენი პოზიციები, მაგრამ აქვე ვიტყვი, რომ ჩემი პოზიციაა ბოლომდე ბრძოლა, ვიდრე თემირლანს არ აღიარებენ უდანაშუალოდ, სანამ გოგაშვილი და სპეცრაზმელი არ დაისჯებიან. ეს იყო ტერაქტი და ამის დამგეგმავი იყო მინისტრი გიორგი გახარია“, – განაცხადა მალხაზ მაჩალიკაშვილმა.
მალხაზ მაჩალიკაშვილმა ზვიად კუპრავას და ზაზა სარალიძეს ის ოთახი დაათვალიერებინა, სადაც სპეცოპერაციის ღამეს თემირლან მაჩალიკაშვილი დაიჭრა. მოგვიანებით კი, თემირლან მაჩალიკაშვილის საფლავზე მივიდნენ.
მანვე დღეს განმარტება გააკეთა თემირლან მაჩალიკაშვილის ტელეფონის ექსპერტიზის საკითხზე. "ქრონიკის" ინფორმაციით, მათ ექსკლუზიურად მოიპოვეს მასალები, რომელთა შორისაც ერთ-ერთი დოკუმენტი სატელეფონო ამონაწერია. „ამონაწერიდან ირკვევა, ვისთან დარეკა აჰმედ ჩატაევმა სოფელ კირნათიდან, თურქეთის საზღვრის გადმოკვეთისთანავე. ირკვევა, რომ რამდენიმე სატელეფონო ზარის ადრესატი, თემირლან მაჩალიკაშვილი იყო. საქმის მასალების მიხედვით, ეს ნომერი გარდაცვლილ მაჩალიკაშვილზე ოფიციალურად იყო გაფორმებული“, – იუწყება „ქრონიკა“ .
„რაც შეეხება ტელეფონის ექსპერტიზას, ეს არის აგორებული ტყუილი, რადგან სუს-მა დაინახა, რომ მთელი საქართველო და ხეობა ჩვენს გვერდით არის და ათას სისულელეს იგონებენ. ძალა ჩვენს ხელშია, ხალხის ხელშია და ხალხს ჩემი სიმართლის სჯერა", – განაცხადა მალხაზ მაჩალიკაშვილმა.
როგორც ზვიად კუპრავამ ჟურნალისტებთან საუბრისას განაცხადა, მალხაზ მაჩალიკაშვილთან და ზაზა სარალიძესთან ერთად გადაწყვეტს შემდგომ სამოქმედო ნაბიჯებს.
"ჩვენ ჩამოვედით პანკისის ხეობაში მაჩალიკაშვილებთან, რათა ამ 14-დღიანი იძულებითი პატიმრობის შემდეგ ვისაუბროთ მომავალი ბრძოლის გეგმებზე და სტრატეგიაზე, თუ რა ფორმით გავაგრძელებთ ბრძოლას. ჩვენ ვიბრძოლებთ მანამ, სანამ არ დავადგენთ სიმართლეს, როგორც ამ ორ საქმეზე, ასევე სხვა საქმეებზე. როდესაც ამ საქმეებზე ვსაუბრობთ, აუცილებლად ვფიქრობთ სხვა ოჯახებზეც, რომლებიც სამართალს ეძებენ, ჩვენ ყველას ინტერესებს ვატარებთ, ვინც სისტემის მსხვერპლია", – განაცხადა ზვიად კუპრავამ.
