“ვარდების რევოლუციიდან” 22 წელი გავიდა. 2003 წლის ნოემბერში საქართველოს ხელისუფლება შეიცვალა მშვიდობიანი გზით. მოქალაქეთა მასობრივი საპროტესტო გამოსვლები დაახლოებით სამ კვირას გაგრძელდა და 23 ნოემბერს საქართველოს პრეზიდენტის, ედუარდ შევარდნაძის, გადადგომით დაგვირგვინდა. საპროტესტო აქციების მსვლელობისას სხვადასხვა პოლიტიკოსები გაერთიანდნენ, გადამწყვეტი როლი მშვიდობიანი პროტესტის გამარჯვებაში კი მიხეილ სააკაშვილმა შეასრულა, რომელიც 2004 წელს საქართველოს პრეზიდენტად აირჩიეს. 

პროტესტი გამოიწვია დარღვევებმა 2 ნოემბრის საპარლამენტო არჩევნებზე, რომლის შედეგები, ფართოდ გავრცელებული აზრით, სახელისუფლებო პარტიების, საქართველოს მოქალაქეთა კავშირის და აღორძინების კავშირის სასარგებლოდ იყო გაყალბებული.

ეს შეფასება დაადასტურა განსხვავებებმა არჩევნების წინასწარ შედეგებსა და ეგზიტპოლებს, აგრეთვე ხმების პარალელური დათვლის შედეგებს შორის.

ხელისუფლების შეცვლის ეს ეპიზოდი ,,ვარდების რევოლუციის” სახელით შევიდა ისტორიაში, საქართველოს მოსახლეობისა და საერთაშორისო თანამეგობრობის უდიდესმა ნაწილმა „ვარდების რევოლუცია” ჩათვალა მნიშვნელოვან ნიშანსვეტად, რომელიც საქართველოს დემოკრატიული ღირებულებებისაკენ შებრუნებას მოასწავებდა, რაც შემდგომში განხორციელდა კიდეც. 

საქართველოს უახლეს ისტორიაში 2003 წლის 23 ნოემბერი შესულია როგორც ახალი, დემოკრატიული სახელმწიფოს შექმნის თარიღი.