პრემიერმინისტრი ირაკლი ღარიბაშვილი სამუშაო ვიზიტით ბრიუსელში იმყოფება. იგი ქართულ დელეგაციასთან ერთად დაესწრება ევროკავშირი-საქართველოს ასოცირების საბჭოს მეორე სხდომას, სადაც ქართული მხარე ანგარიშით უნდა წარდგეს.
ძირითადი განსახილველი საკითხები იქნება საქართველო-ევროკავშირის ურთიერთობა, განსაკუთრებული ყურადღება დაეთმობა საკითხს, თუ როგორ მიმდინარეობს ასოცირების ხელშეკრულების იმპლემენტაციის პროცესი და ვიზალიბერალიზაცია.
ქართულ მხარეს იმედი აქვს, რომ კომისია პოზიტიურ მოხსენებას გამოაქვეყნებს და საქართველოს მოქალაქეებს შეეძლებათ უვიზოდ მიმოსვლა შენგენის ზონაში.
"ჩვენ გვაქვს განცდა, რომ საქართველოს ძალისხმევა იქნება პოზიტიურად აღქმული და შეფასებული", – აღნიშნა ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრმა დავით ბაქრაძემ.
საერთო პროგრამის პარალელურად ევროსაბჭოს საგარეო ურთიერთობის კომიტეტზე სიტყვით გამოვა საგარეო საქმეთა მინისტრ. გიორგი კვირიკაშვილი. მისი მოხსენების ძირითადი თემაა პოლიტიკური ვითარება საქართველოში.
საბჭოს სხდომის დასრულების შემდეგ პრემიერი, ევროკავშირის უმაღლესი წარმომადგენელი ფედერიკა მოგერინი და ევროკომისარი იოჰანეს ჰანი ერთობლივ განცხადებებს გააკეთებენ.
ირაკლი ღარიბაშვილი ევროკომისიის ვიცე პრეზიდენტ ფრანს ტიმერმანს და ევროპული საბჭოს პრეზიდენტს დონალდ ტუსკსაც შეხვდება.