4 ოქტომბერს, თბილისის პარალელურად, ემიგრანტები მსოფლიოს 20-მდე ქვეყანაში საქართველოს სოლიდარობის აქციებს მართავენ. ამის შესახებ ინფორმაციას “ქარები” ავრცელებს.

მათი ცნობით აქციები გაიმართება: აშშ-ში, კანადაში, ავსტრალიაში და ევროპის 15 ქვეყანაში, მათ შორის: იტალიაში, ფინეთში, შვედეთში, ჩეხეთში, გერმანიაში, ნიდერლანდებში, ირლანდიაში, საფრანგეთში, შვეიცარიაში, ესპანეთში, ავსტრიაში, ბელგიაში, პორტუგალიაში და კვიპროსში და დიდ ბრიტანეთში.

ბოლო ცნობით საპროტესტო გამოსვლების მოწყობა 36 ქალაქში იგეგმება.”შაბათს, 4 ოქტომბერს ემიგრანტები მთელი მსოფლიოდან საქართველოსადმი სოლიდარობის აქციებს ვმართავთ.

ემიგრანტებს გვსურს საქართველოში არსებული მძიმე პოლიტიკური ვითარება საერთაშორისო ყურადღების ცენტრში მოვაქციოთ.

უკვე 300 დღეზე მეტია, რაც ქართველი ხალხი აპროტესტებს საქართველოში დამყარებულ რუსულ რეჟიმს. არალეგიტიმური ხელისუფლება სისტემურად ზღუდავს დემოკრატიას, არღვევს ადამიანის უფლებებს და საფრთხეს უქმნის ქვეყნის ევროპულ მომავალს. დაპატიმრებულია მრავალი აქტივისტი და პოლიტიკური ოპონენტი.

4 ოქტომბერს არალეგიტიმური ხელისუფლება ატარებს ადგილობრივი თვითმმართველობის არჩევნებს, რომელსაც ოპოზიციური პარტიების უმრავლესობა ბოიკოტს უცხადებს. ამ დღეს ქართველი ხალხი კვლავ გამოდის ქუჩაში გასაპროტესტებლად.

ჩვენც ემიგრანტები ვიკრიბებით 4 ოქტომბერს მთელ მსოფლიოში, რათა მხარდაჭერა გამოვხატოთ და ვაჩვენოთ რუსულ რეჟიმს ჩვენი ერთიანობა და ძალა.

ძალა ერთობაშია! ცეცხლი ოლიგარქიას!”, — ნათქვამია “ქარების” მიერ გავრცელებულ ინფორმაციაში.