ქართველ ხალხს ევროპასთან ყოფნა სურს და არა რუსეთთან – კალასი

0
105

ესტონეთის პრემიერმინისტრმა, კაია კალასმა, “ამერიკის ხმასთან” ინტერვიუში განაცხადა, რომ ქართველ ხალხს ევროპასთან სურს ყოფნა და არა რუსეთთან. თუმცა, ის აღნიშნავს, რომ მომდევნო ეტაპზე გადასასვლელად, საქართველომ და ქვეყნის ლიდერებმა, ევროკომისიის კრიტერიუმები უნდა დააკმაყოფილონ.

“ევროკომისია გამოვიდა წინადადებით და საქართველოსთვის ეს ნიშნავს იმას, რომ თუ საქართველო აკმაყოფილებს კრიტერიუმებს, მაშინ შეგვიძლია გადავიდეთ შემდეგ საფეხურზე. რა თქმა უნდა, ამ კრიტერიუმების შესრულება საქართველოსა და საქართველოს ლიდერების პოლიტიკური ნებაა, რომ გააგრძელონ ევროპულ გზაზე სვლა. როცა ახალ ამბებს ვუყურებ ვხედავ, რომ ხალხის ნება არის ევროპასთან ყოფნა და არა რუსეთთან.

ყველა ეს რუხი ზონა კონფლიქტის წყაროა და რუსეთს ნამდვილად არ სურს ამ ქვეყნების [ხელიდან] გაშვება. სწორედ ამაში მდგომარეობს ამ ბრძოლის არსი. იცით, ეს არ ეხება დამატებით ტერიტორიებს იმდენად, რამდენადაც დემოკრატიისა და ღირებულებების გაფართოებას, იმ ღირებულებების, რომელთა თავიდან აცილებას რუსეთი ნამდვილად ცდილობს”, – ამბობს ესტონეთის პრემიერი.

ის საუბრობს უკრაინის ომზეც და აღნიშნავს, რომ რუსეთი რომ უკეთეს ქვეყნად ჩამოყალიბდეს, საკუთარ “ბოლო კოლონიურ ომში” უნდა დამარცხდეს. მისი შეფასებით, უკრაინისადმი დასავლეთის მხარდაჭერა რუსეთს აჯობებს.

“ჩვენ ურთიერთ-დასუსტების ბრძოლაში ვართ. ეს არ არის ჩიხი, არამედ დასუსტების ომი. ამას დიდი დრო სჭირდება. დასუსტების ომში არის სამი ძირითადი ელემენტი – გყავს ხალხი, გაქვს რესურსი და გაქვს შემართება. სამივე თვალსაზრისით, რუსეთი ფიქრობს, რომ მას შეუძლია უკრაინას აჯობოს. მაგრამ, მე მაქვს საფუძველი ვიფიქრო, რომ უკრაინისადმი ჩვენი მხარდაჭერა რუსეთს აჯობებს…

რესურსების თვალსაზრისით – ევროპის მთლიანი შიდა პროდუქტი 7-ჯერ აღემატება რუსეთისას. ჩვენ ასევე ვხედავთ სანქციების შედეგებს, რაც იმას ნიშნავს, რომ რუსეთის ბიუჯეტს ნამდვილად უჭირს. მათ ბიუჯეტის მესამედი დაკარგეს და სანქციების გამო ქვეყნის გარეთ სესხს ვერ იღებენ. ასე რომ, მათ უჭირთ.

სამხედრო დახმარების კუთხით კი – თუ რამშტაინის კოალიციაზე ვიფიქრებთ, ამ კოალიციის თავდაცვის ბიუჯეტი 13-ჯერ აღემატება რუსეთისას. ასე რომ, ჩვენ შეგვიძლია აქაც მეტი ბრძოლისუნარიანობა გამოვიჩინოთ.

და მესამე ელემენტი არის უკრაინელების შემართება. ისინი საკუთარი სახლების დასაცავად იბრძვიან და მათი შემართება ნამდვილად უფრო მაღალია, ვიდრე რუსეთის. ჩვენც იგივე უნდა გავაკეთოთ და გვჯეროდეს უკრაინის გამარჯვების,” – განაცხადა ესტონეთის პრემიერმა.

წინა სტატიარატი ბრეგაძე სააკაშვილზე – ამ ადამიანს არ აქვს გააზრებული, თუ რა დანაშაული ჩაიდინა, არც ინანიებს
შემდეგი სტატია“გადაწყვეტილება უნდა მიიღონ ქართველებმა” – რას ამბობს ევროკავშირის ელჩი საარჩევნო ბარიერზე
ტელეკომპანია ოდიშის საინფორმაციო სამსახური