“დღევანდელ სასამართლო პროცესზე ჩვენ დავინახეთ ირაკლი კობახიძე, მამუკა მდინარაძე, არჩილ თალაკვაძე წარმოდგენილი პროკურორების სახით. […]
დღევანდელი პროცესის მერე ყველასთვის ნათელია, რომ პროკურატურა ამ საქმეში ბრალდების მხარეს არ წარმოადგენს, პროკურატურა ამ საქმეში წარმოადგენს ქართულ ოცნებას.
რაც შეეხება მიხეილ სააკაშვილის სიტყვას, მიხეილ სააკაშვილის სიტყვა იყო ძალიან დიდი საზოგადოებრივი მნიშვნელობის მატარებელი და ამავე დროს, მიხეილ საკაშვილის სიტყვამ წერტილი დაუსვა ყველა იმ ინსინუაციას, რაც ამ საქმეზე წარმოდგენილ ხარჯებს ეხება – ყველა ხარჯი, რასაც მიხეილ სააკაშვილს და თემურ ჯანაშიას ამ საქმეში ედავებიან, სახელმწიფოს ნორმალური ფუნქციონირებისთვის იყო დახარჯული.” – თქვა ადვოკატმა ბექა ბასილაიამ.
საქართველოს მესამე პრეზიდენტის ადვოკატები ე.წ. პიჯაკების საქმეზე სახელმწიფო დაცვის სპეციალური სამსახურის უფროსის, ანზორ ჩუბინიძის დაკითხვას ითხოვენ.
უფლებადამცველები ამბობენ, რომ ჩუბინიძეს, რომელიც სდსს-ის უფროსის თანამდებობას მიხეილ სააკაშვილის პრეზიდენტობის ბოლო წელს იკავებდა, არანაკლები თანხები აქვს დახარჯული იგივე მიზნებით, რაზეც მესამე პრეზიდენტს გამოძიება ედავება.
“ანზორ ჩუბინიძე მიხეილ სააკაშვილის პრეზიდენტობის ბოლო წელს იყო სახელმწიფო დაცვის სპეციალური სამსახურის უფროსი, რომელმაც დახარჯა არანაკლები თანხა, ლამის რამდენიმე მილიონი, იგივე მიზნებით და ფუნქციებით, რაზეც ასამართლებენ მიხეილ სააკაშვილს, რაზეც ასამართლებენ თემურ ჯანაშიას, მაგრამ ანზორ ჩუბინიძის მიმართ მთელი ამდენი წლის მანძილზე, პროკურატურას კითხვები არ ჰქონია”, – თქვა ბექა ბასილაიამ.