ყოფილი პრეზიდენტი მიხეილ სააკაშვილი გორის ჰოსპიტალში შვილმა და დედამ მოინახულეს.
ედუარდ სააკაშვილის თქმით, მიხეილ სააკაშვილს სისუსტე შეემჩნევა თუმცა მისი ფსიქოლოგიური მდგომარეობა კარგია.
“აქვს სურვილი, რომ დაესწროს პროცესს და მეც იმედი მაქვს, რომ ამის შესაძლებლობა ექნება. პოლიტიკაზე დიდად არ გვისაუბრია. უბრალოდ მოვინახულეთ. ძალიან სასიამოვნო შეხვედრა იყო და იმედიანად ვუყურებ ახლო მომავალს, ზოგადად”, – განაცხადა ედუარდ სააკაშვილმა.
მესამე პრეზიდენტის დედის გიული ალასანიას თქმით, მიხეილ სააკაშვილი სუსტად არის, თუმცა ხვალინდელ სასამართლო პროცესზე დასწრებას აპირებს.
,,დიდი განსხვავება ვერ შევატყვე. სუსტად არის, ძირითადად ზის. ეს ფერმენტები რაც გამოაცხადეს, როგორც ჩანს, ასეა. ეს პრობლემები არის. მე მაგალითად, ძალიან ვღელავდი გუშინ, იმიტომ, რომ იქ ვრცელი გამოსვლა ჰქონდა და გაძლო და არ ვიცი… იმედია, რომ ხვალაც იგივე მოხდება. ჩემთვისაც გუშინდელი მაგის გამოსვლა ძალიან საინტერესო იყო, ბევრი რამე ისეთი გავიგე, რაც არ ვიცოდი. 7 ნოემბრის დეტალებთან დაკავშირებით, მე მგონი, შეკითხვები აღარავის არ უნდა დარჩეს.განწყობილია, რომ იყოს ხვალ პროცესზე” – თქვა გიული ალასანიამ.
ხვალ 2 დეკემბერს თბილისის საქალაქო სასამართლოში ე.წ. პიჯაკების საქმეზე მიხეილ სააკაშვილის პროცესი გაიმართება.