სალონიკში ქართველი ქალის მკვლელობის ბრალდებით დაკავებულმა კაცმა სიცოცხლე თვითმკვლელობით დაასრულა. ბერძნული მედიის ცნობით, მან საკანში თავი ჩამოიხრჩო.
სალონიკში 56 წლის საქართველოს მოქალაქე ელენე ხალამიდი რამდენიმე დღის წინ მოკლეს. მკვლელობაში ბრალდებული 55 წლის კაცი პოლიციამ მომხდარი დანაშაულიდან რამდენიმე საათში დააკავა. დაკავებულიც საქართველოს მოქალაქე იყო.
პოლიციამ ამოიღო მკვლელობის იარაღი – დანა, რითაც კაცმა ქალს დაზიანებები მიაყენა, მათ შორის, სასიკვდილო. როგორც მეზობლები ამბობენ, ქალი ოჯახში დამხმარედ მუშაობდა, კაცი კი მშებნებლობაზე იყო დასაქმებული, თუმცა, ალკოჰოლდამოკიდებულების გამო ხშირად რჩებოდა უმუშევარი.
მეზობლებისვე თქმით, ქალსა და კაცს შორის კამათიც სწორედ ამ ნიადაგზე ხდებოდა, რადგან ქალი კაცის ცხოვრების წესით უკმაყოფილო იყო. მკვლელობასაც წინ სწორედ კამათი უძღოდა:
“დაახლოებით ნახევარი საათის განმავლობაში კამათობდნენ, ბოლოს ქალის ხმა ისმოდა, გთხოვ, ნუ მომკლავო… მერე ეს კაცი აივნიდან გადმოხტა, ხელები სისხლიანი ჰქონდა”, – ამბობდა თვითმხილველი.
სალონიკში მომხდარი მკვლელობის დეტალები შეგიძლიათ იხილოთ აქ:
“ქალი ეხვეწებოდა, ნუ მომკლავო…” – სალონიკში მომხდარი მკვლელობის დეტალები