ოკუპირებულ აფხაზეთთან მდებარე სოფელ წყოუშთან სამოქალაქო მოძრაობა „ხმისა“ და „ენელაის“ ორგანიზებით აქცია-პერფორმანსი გაიმართა. აქციის მონაწილეებმა მინდორზე საქართველოს რუკის კონტური გამოსახეს. სამოქალალო ხმის წარმომადგენლის ირაკლი ხარჩილავას განცხადებით, ხელისუფლებამ დასაჯა ერი რუსეთის გამო, თუმცა ჩვენმა ახალგაზრდებმა დაიცვეს ის რაც ეკუთვნის ჩვენს ქვეყანას. აქცია-პერფორმანსი ფახულანში, საბერიოს საოკუპაცია ხაზთან დასრულდა. ცნობისთვის ზუსტად ერთი წლის წინ, 20 ივნისს, მართლმადიდებლობის საპარლამენტთაშორისო ასამბლეის სხდომამ, რომელიც საქართველოს პარლამენტის სხდომათა დარბაზში იმართებოდა, დიდი პროტესტი გამოიწვია. საზოგადოების აღშფოთების მიზეზი სხდომის წამყვანი რუსი კომუნისტი დეპუტატი სერგეი გავრილოვი გახდა, ოკუპანტი ქვეყნის დეპუტატმა საქართველოს პარლამენტის თავმჯდომარის სავარძელი დაიკავა. პარლამენტში განვითარებულმა პროცესებმა რუსთაველის გამზირზე მასშტაბური პროტესტი გამოიწვია და პარლამენტის შენობასთან შეკრებილი აქციის მონაწილეები პოლიციამ ღამით ცრემლმდენი გაზისა და რეზინის ტყვიების გამოყენებით დაშალა. 20 ივნისის მოვლენებიდან ერთი წლის თავზე გამოძიება დასრულებული არ არის. აქციის დაშლისას დაშავდა 300-მდე ადამიანი, 187 დემონსტრანტი, 40-მდე ჟურნალისტი, 73 სამართალდამცველი, აქციის ორმა მონაწილემ მაკო გომურმა და გიორგი სულაშვილმა კი თვალი დაკარგეს.