უჩვეულო 20 მაისი, რომელიც მე-12 კლასელებისთვის ტრადიციული ბოლო ზარისა და ბანკეტების გარეშე ჩაივლის. დაკეტილ სკოლებში სამარისებური სიჩუმე ანგრევს კედლებს, აქ არც თეთრი პერანგების შრიალია, ვერც სახალისო ნახატებს ნახავთ, ვერც სამახსოვრო წარწერებსა და მილოცვებს…კორონავირუსის გამო შეცვლილი რეალობა – ასეთია სკოლის უკანასკნელი დღე ბავშვებისა და ბოლო ზარის გარეშე. წელს პანდემიის გამო სკოლებში ბოლო ზარი არ დარეკილა, რამდენიმე თვეა მოსწავლეები მერხების ნაცვლად სახლებში საკუთარ ლეპტოპებთან სხედან და ონლაინგაკვეთილებს ესწრებიან. ყველაზე ემოციური და სევდანარევი სიხარულის ეს დღე კახათის საჯარო სკოლის მე-12 კლასელებს გერმანულის მასწავლებელმა ორიგინალურად მიულოცა და სიურპრიზი მოუწყო.