„მე არ ვიბრძვი მხოლოდ 3 ათასი ლარის ოდენობის ხარჯის თავის არიდებისთვის, მე კანონმორჩილი მოქალაქე ვარ, რომელიც არ ვცნობ დარღვევის ოქმს, ვგმობ ამ თავხედობასა და ტყუილს“, – აცხადებს ჩვენთან საუბარში, ზუგდიდელი ლადო აბსანძე, რომელიც შვილთან ერთად მაღაზიასთან იმყოფებოდა, როცა ისინი სამართალდამცავებმა სოციალური დისტანციის წესის დარღვევისთვის 3 ათასი ლარით დააჯარიმეს. შემთხვევა სუპერმარკეტ „ჯიბეში“ 30 მარტს მოხდა. როგორც იგი ამბობს, ისინი უკანონოდ დააჯარიმეს და გასაჩივრებას გეგმავს. მისივე თქმით, ის აპირებს ბოლომდე იბრძოლოს სიმართლის გასარკევვად და ასევე გეგმავს შს მინისტრს მიმართოს თხოვნით, რომ ჯარიმის თანხა პრემიის სახით ნებისმიერ ღირსეულ პოლიციელს გადასცეს. ამ საკითხზე სპეციალური განცხადება ზუგდიდის მერმა, გიორგი შენგელიამაც გააკეთა და მოსახლეობას მოუწოდა, რომ მაქსიმალურად დაიცვან წესრიგი. შს სამინისტროში მოქალაქის დაჯარიმების ფაქტს ადასტურებენ და ამბობენ, რომ ლადო აბსანძეს და მის სრულწლოვან შვილს სამართალდამცავებმა სოციალური დისტანციის წესის დაცვისკენ არაერთხელ მოუწოდეს, თუმცა უშედეგოდ. მათივე მტკიცებით, მოქალაქეს ჯარიმა სწორედ ამის შემდეგ გამოუწერეს. კიდევ ერთხელ შეგახსენებთ, რომ საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას, რაც გულისხმობს ფიზიკური პირის დაჯარიმებას 3 ათასი ლარით, ხოლო იურიდიული პირის 15 ათასი ლარით.