სამეგრელო-ზემო სვანეთის რეგიონში თვითიზოლაციაში 329 პირი იმყოფება, თვითიზოლაცია მოხსნილი აქვს 63 პირს, კარანტინში იმყოფება 26 ადამიანი, აქედან 13 იძულების წესითაა გადაყვანილი. ამის შესახებ ინფორმაცია ჟურნალისტებს დღეს გამართულ ბრიფინგზე საზოგადოებრივი ჯანდაცვის ცენტრის დირექტორმა ნანა ოდიშარიამ მიაწოდა.
სამეგრელო-ზემო სვანეთის გუბერნატორის ალექსანდრე მოწერელიას თქმით, სამეგრელო-ზემო სვანეთში საკარანტინო ზონების მოწყობის საკითხი დასრულდა. საკარანტინო ზონად, სადაც მოქალაქეები 14 დღიან საკარანტინო პერიოდს გაივლიან, სასტუმრო ,,პალმ-ბიჩი”, სასტუმრო ,,ანაკლია” და სასტუმრო ,,პრატაფსი” შეირჩა. ჯამში ანაკლიაში 138 ნომერი იქნება, გარდა ამისა ორი საკარანტინო სივრცე მოწყობილია მესტიაში.
,,უკვე მოხდა პერსონალის გადამზადება, ასევე მათი აღჭურვა შესაბამისი ტანსაცმლით. კარანტინში მყოფ ჩვენს მოქალაქეებს ექნებათ სრული კომფორტი“ განაცხადა სახელმწიფო რწმუნებულმა. ალექსანდრე მოწერელიამ ასევე ისაუბრა, მოხალისეების საკითხზე, რეგიონში ამ ეტაპზე 250 მოხალისეა მობილიზებული, რომელთა გადამზადებას წითელი ჯვარი ახდენს. მოხალისეები უკვე ჩაერთვნენ უფასო სასადილოებიდან 70 წელს გადაცილებული მოქალაქეების საკვების შინ მიტანის პროცესში, ასევე მოხალისეები ჩართული არიან სავაჭრო ობიექტებსა და ბანკომატებთან რიგების მოწესრიგებაში. ,,რეგიონის საბავშვო ბაღების აღსაზრდელთა მშობლებს გადაეცემათ სასურსათო კალათა, სადაც სხვადასხვა დასახელების პროდუქტი შედის. მისი დარიგების პროცესში ასევე ჩართული იქნებიან მოხალისეები. ჩვენ მოხალისეთა დამატებით ბაზებს ვქმნით და საჭიროების შემთხვევაში შეგვიძლია დამატებითი ადამიანების გამოყენება ამ მიმართულებით“ – აღნიშნა სახელმწიფო რწმუნებულმა. რწმუნებულის განცხადებით, ,,როგორც ქვეყანაში, ასევე სამეგრელო-ზემო სვანეთის რეგიონში არ არის პროდუქტი დეფიციტური – ,,მეზობელ ქვეყნებთან საბაჟო გამშვები პუნქტი გახსნილია ტვირთისთვის და პირველადი მოხმარების სასურსათო პროდუქციით დატვირთული ავტომობილები ქვეყანაში უპრობლემოდ შემოდიან. მთავრობამ აიღო პასუხისმგებლობა კერძო ბიზნესთან, რომ თუ მათ ასაღები ფასები გაუძვირდებათ, ფასთასხვაობას სახელმწიფო დაფარავს რომ არ გაძვირდეს პროდუქტი სუპერმარკეტებში. ასე რომ პანიკის საფუძველი არ არის და მოსახლეობას შეუძლია მშვიდად იყო და არ აკეთოს მარაგი“ – განმარტა ალექსანდრე მოწერელიამ.
როგორც სახელმწიფო რწმუნებულის აპარატში, ასევე ყველა მუნიციპალიტეტში მუშაობს ცხელი ხაზი, სადაც დარეკვა მოქალაქეებს 24 საათის განმავლობაში შეუძლიათ.
დღესვე პრესკონფერენციაზე განცხადება გააკეთა ზუგდიდის მერმა, გიორგი შენგელიამ, მან მედიას ინფორმაცია მიაწოდა მოხალისეების მიერ განსახორციელებელ სამუშაოებზე და იმ დახმარებაზე ისაუბრა რასაც მუნიციპალიტეტი ოთხ მოწყვლად ჯგუფს გაუწევს (მარტოხელა დედები, მომვლელის პროგრამაში ჩართული ბენეფიციარები, მრავალშვილიანი ოჯახები და 60 წელს გადაცილებული მარტოხელა ხანდაზმულები).