გენერალურ პროკურატურასთან სამოქალაქო აქტივისტებმა ირაკლი შოთაძის გენპროკურორად შესაძლო დაბრუნება გააპროტესტეს დ- მათ უწყებასთან სიმბოლურად, ბოტასები მიიტანეს და პროკურატურის ეზოში გადაყარეს.
„სამართალდამცველთა რეფორმირების ცენტრის“ ხელმძღვანელმა ზვიად კუპრავამ განაცხადა, რომ უწყებაში შოთაძის დაბრუნება ფარცხალაძის დაბრუნებას ნიშნავს და საზოგადოებამ ეს არ უნდა დაუშვას.
,,ბოტასები თავიდან ბოლომდე ასოცირდება პროკურატურასთან, მის რეჟიმთან, ფარცხალაძესთან, შოთაძესთან. რაც მთავარია, ერთი ადამიანის თანხმობით არ შეიძლება დაბრუნდეს და დაინიშნოს ფარცხალაძე. შოთაძის დაბრუნება არის სულში ჩაფურთხება ყველა იმ ადამიანის, იმ ათი ათასი ადამიანის, ვინც იდგა ორი წლის წინ რუსთაველზე. არ დავუშვებთ შოთაძის უკან მობრუნებას”, – განაცხადა კუპრავამ.
პროკურატურის ეზოში ბოტასების გადაყრისას ზვიად კუპრავასა და ლაშა ცუცქირიძის დაკავების მცდელობას შეკრებილებსა და სამართალდამცველებს შორის დაპირისპირება მოჰყვა.
შსს-ს ცნობით ისინი ადმინისტრაციულ სამართალდარღვევა კოდექსის 166-ე და 173-ე მუხლებით დააკავეს, რაც წვრილმან ხულიგნობასა და პოლიციისადმი დაუმორჩილებლობას გულისხმობს.