საქართველოს პარლამენტის გადაწყვეტილებით, ნაციონალური მოძრაობის დეპუტატი ნიკა მელია პარლამენტში ბადრი ბასიშვილმა შეცვალა. გადაწყვეტილებას მხარი 75 დეპუტატმა დაუჭირა, ხოლო წინააღმდეგი 2 იყო.
რიგგარეშე სხდომაზე უმრავლესობის უკმაყოფილება იმ ფაქტმა გამოიწვია, რომ ნაციონალური მოძრაობის წარმომადგენლის კენჭისყრის პროცესს თავად პარტიის წევრები არ ესწრებოდნენ.
ნაციონალური მოძრაობა და ზოგადად საპარლამენტო ოპოზიცია უკვე რამდენიმე თვეა რაც ბოიკოტის რეჟიმშია და პარლამენტის სხდომებს არ ესწრება მას შემდეგ, რაც პროპორციული საარჩევნო სისტემის კანონპროექტი ჩავარდა
ნიკა მელიას ადგილმონაცვლის საკითხის განხილვას გიგი უგულავა გამოეხმაურა. მისი თქმით „მელია აბსოლუტურად უკანონოდ, კონსტიტუციის დარღვევით გააგდეს პარლამენტიდან”.
„ეს არის გაგდება და არავითარი სამართლის აღსრულება არ არის. უმრავლესობის მოვალეობაა მის ადგილმონაცვლეს მისცეს ხმა. ეს თუ არ მოხდება, მანაც უნდა იჩივლოს საკონსტიტუციო სასამართლოში. საკონსტიტუციო სასამართლო არ ბრწყინავს, მაგრამ თეთრი შავზე კონსტიტუციის დარღვევაა, თუ ამასაც არ აღიარებს, კიდევ უფრო ღრმა კრიზისში შევა. ნებისმიერი რამ, რასაც აკეთებს ეს მთავრობა, საბოლოო ჯამში, მას კრიზისად უბრუნდება. ეს არის ის მოდალობა, რაც შექმნა ივანიშვილმა ამ საუკუნის ტყუილის შემდეგ“, – განაცხადა უგულავამ.