„აკადემიური პალმების კავალრის ორდენი“ – ეს ტიტული ზუგდიდის პრინც მიურატის სახელობის სკოლის პედაგოგს, მედეა ჭაჭუას მიენიჭა. საფრანგეთის ელჩმა საქართველოში, დიეგო კოლასმა საქართველოში აღნიშნული ჯილდო სულ სამ პედაგოგს გადასცა. აღსანიშნავია, რომ აკადემიური პალმების ჯილდო 1808 წელს იმპერატორ ნაპოლეონ პირველმა დააარსა. ეს ჯილდო მიზნად ისახავდა, საფრანგეთის მადლიერების გამოხატვას საერო სწავლების განვითარების მესვეურთა მიმართ. 1955 წლიდან, აკადემიური პალმები პატივს მიაგებს ასევე იმ მოღვაწეთა დამსახურებებს, რომლებიც მთელ მსოფლიოში საფრანგეთის ეროვნული განათლების პოპულარიზაციისთვის მუშაობენ. ჩვენმა გადამღებმა ჯგუფმა გადაწყვიტა ქალბატონ მედეა ჭაჭუას სკოლაში წვეოდა და მიღებული საპატიო ჯილდოდან გამომდინარე, შთაბეჭდილებები და ემოციები ჩვენთვისაც გაეზიარებინა. ბავშვობის დროინდელი ოცნება, რომ გამხდარიყო ფრანგული ენის მასწავლებელი აიხდინა და დღეს უკვე ოთხ ათეულ წელზე მეტია, ფრანგული ენის მასწავლებელია. სკოლის მოსწავლეები მასზე დიდი სიყვარულითა და სითბოთი საუბრობენ. მას ასევე პედაგოგებმა სკოლაში გულთბილი დახვედრა მოუწყვეს. როგორც პედადოგები ამბობენ, ორმაგად სასიხარულოა ის ფაქტი, რომ მედიკო მასწავლებელი მათთან მუშაობს და სხვებისთვის მისაბაძი, მაგალითის მიმცემი დამსახურებული პედაგოგია.
