„ეს გადაწყვეტილებაც ადასტურებს იმას, რომ ივანიშვილს ეშინია ნიკა მელიას პოლიტიკური საქმიანობის,” – აცხადებს “ნაციონალური მოძრაობის” ერთ-ერთი ლიდერი თინა ბოკუჩავა ნიკა მელიასთვის გამოტანილ განაჩენზე საუბრისას.
მისი თქმით, იმის გამო, რომ ნიკა მელიას პოლიტიკური უფლებამოსილება შეეზღუდოს, ბიძინა ივანიშვილმა სასამართლო სრულ სამართლებრივ ნონსესში ჩააგდო.
“მთელი სასამართლო სისტემა ნონსესში შეიყვანა, რადგან ელექტრონული სამაჯურის დამატებით ამ გადაწყვეტილებამ ძალაში დატოვა ქვედა ინსტანციის გადაწყვეტილება, რომელიც უფლებამოსილების განხორციელებას უზღუდავს ნიკა მელიას,“ – აცხადებს თინა ბოკუჩავა.
რომან გოცირიძის განცხადებით, გადაწყვეტილებას სასამართლო ვერ იღებს, გადაწყვეტილება მიიღება „სხვაგან“. გოცირიძე ამბობს, რომ ელექტრონული სამაჯურის გამოყენებით, ნიკა მელია ივანიშვილმა დაღდასმულ პირად აქცია.
„რაც შეეხება სამაჯურს, სამაჯური გამოიყენება ძირითადად კრიმინალების წინააღმდეგ და დეპუტატზე სამაჯურის დადება, ვიზუალურად და სიმბოლურად, ძალიან შეურაცხმყოფელია. ნიკა მელია პარლამენტში მოსვლისა და წასვლის გამო, ხელისუფლებამ გამოიყვანა დაღდასმულად,“ – ამბობს გოცირიძე.
პოლიტიკური მოძრაობა ”გამარჯვებული საქართველოს” დამფუძნებელი, კოტე კემულარია ამბობს, რომ ხელისუფლება სრულ აგონიაშია. მისი თქმით, კონსტიტუციაში პირდაპირ არის გაწერილი, რომ თუ სასამართლო დეპუტატს არ აპატიმრებს, სადეპუტატო უფლებამოსილების განხორციელების სრული და შეუზღუდავი უფლება აქვს.
„ახლა აღარც პარლამენტს და აღარც სასამართლოს არ აქვს მისთვის სამაჯურის აღარც ხელზე გაკეთება, ეს ღიმილის მომგვრელია, ოღონდ მწარე ღიმილის. ძალიან ცუდ კვალს ტოვებს “ოცნება” სამართლებრივ სფეროში,“ – ამბობს კემულარია.