გუშინ საღამოს სტამბოლში, იმ სახლში, სადაც მუშაობდა, საქართველოს მოქალაქე გარდაცვლილი იპოვეს. გარდაცვლილი 51 წლის ქალია. საქართველოს კონსული სტამბოლში ირაკლი ასაშვილი საქმის პროკურორისგან მიღებულ ინფორმაციაზე დაყრდნობით აცხადებს, რომ გარკვეული საგამოძიებო მოქმედებები უკვე ჩატარებულია და არსებობს გარდაცვალების გარემოებათა რამდენიმე ვერსია.
”უკვე მოხდა შემთხვევის ადგილის დათვალიერება, ამოღებულია საცხოვრებელ სახლში არსებული კამერებიდან ვიდეოჩანაწერები, დაიკითხა სახლის მეპატრონე, ასევე სახლში არის დაცვა და დაცვის თანამშრომლები არიან დაკითხულები. ახლა გამოძიება ელოდება ექსპერტიზის დასკვნას. მისი მიღების შემდეგ ჩანიშნული მაქვს პროკურორთან შეხვედრა. ამ ეტაპზე გარდაცვალების ყველა ვერსია განიხილება. ერთადერთი ფაქტი, რომელიც ვიდეომასალიდან ჩანს არის ის, რომ ქალის გარდაცვალების დროს სახლის მეპატრონე სახლში არ იმყოფებოდა”, – აცხადებს კონსული.
მისივე თქმით, გარდაცვლილის გადმოსვენების ხარჯებს სახელმწიფო დაფარავს, თუმცა ჯერჯერობით უცნობია, როდის მოხდება მისი გადმოსვენება.