საჯარო რეესტრმა დღეს დილით საბოლოოდ დაარეგისტრირა რევაზ საყევარიშვილის მოთხოვნა და შეუჩერა მას რუსთავი 2-ის დროებითი მმართველის უფლებამოსილება. ამ საჯარო ჩანაწერით კვლავ აღდგა ტელეკომპანიის ძველი მენეჯმენტის უფლებამოსილება. რეგისტრაცია საჯარო რეესტრში დღეს დილით 9 საათსა და 51 წუთზე დასრულდა.

 ძმები ყარამანიშვილების ადვოკატის  ზაზა ბიბილაშვილის თქმით, მიუხედავად იმისა, რომ ტელეკომპანიის გენერალურ დირექტორს და ფინანსურ მენეჯერს უფლებამოსილება აღუდგათ და უფლებამოსილება შეჩერებული მენეჯმენტი დღეიდან ისევ შეუდგება მუშაობას, კლავ არსებობს გარკვეული საფრთხეები ტელევიზიისთვის.

"მოხდა დროებითი განმუხტვა, ტაქტიკური უკუსვლა, რომლის შემდეგაც მთავარია ჩვენ არ მოვადუნოთ ყურადღება და გავათვიცნობიეროთ, რომ ეს ბრძოლა გრძელდება," – აღნიშნა ზაზა ბიბილაშვილმა.  

დროებითი მმართველების ირგვლივ მიმდინარე კალეიდოსკოპურ მოვლენებს სოციალურ ქსელში იურისტი ვალერი გელბახიანი ეხმაურება. იგი ვარაუდობს, რომ , „რუსთავი2“-ის გამო ხელისუფლებიდან ვინმე დაიჯება, თუმცა ეს არ გამოიხატება ვინმეს დაჭერით. გელბახიანი თქმით, შესაძლოა, რომ მოულოდნელად რომელიმე თანამდებობის პირმა ჯანმრთელობის მდგომარეობის გამო თანამდებობა დატოვოს და სწორედ ის პირი იქნება ამ საქმის გამო დასჯილი.

„ვინც ხელისუფლება დაარწმუნა, რომ ამ საქმეს მოიგებდა, „ნაციონალებს“ სუფთად აახევდა „რუსთავი 2“-ს, ის დაისჯება. თქვენ ხედვათ რ2 არ გადავიდა ახალი მესაკუთრის ხელში, ეს საკითხი სულ მცირე წელწად-ნახევარი გაიწელება და ამასობაშ არჩევნები დასრულდება, რ2-ს ვერ გამოაცლიან „ნაციონალურ მოძრაობას“. დღეს ვხედავთ რომ ამ თემამ ბინძური სახე მიიღო.

პირდაპირ გეტყვით, რომ ამ საქმის გამო ვიღაცა აუცილებლად დაისჯება, ეს არ მოხდება პირდაპირ ვინმეს დაჭერით, დააკვირდით მოვლენებს, უცბად თითქოს ვიღაცა ავად გახდება, ამის გამო თანამდებობიდან გადადგება და აი სწორედ ის იქნება დასჯილი ამ საქმის გამო“- აცხადებს ვალერი გელბახიანი.