აფხაზეთის ლეგიტიმური მთავრობის ჯანდაცვის მინისტრი ქეთევან ბაკარაძე „კვირის პალიტრასთან''' გალში მომხდარი ავტოკატასტროფის ახალ დეტალებზე საუბრობს
– ტრაგედია დატრიალდა, დაღუპულები არიან ჩვენი ექიმები. არაჩვეულებრივი ადამიანები გახლდათ. ორივე ახალგაზრდა, ოჯახები და მცირეწლოვანი შვილები დარჩათ. სამწუხაროდ, რამდენიმე მედიასაშუალებამ არასწორი ინფორმაცია გაავრცელა, თითქოს ავარიას 6 ადამიანი ემსხვერპლა. ასევე, ისიც ითქვა, რომ თბილისში სასწრაფო დახმარების მძღოლისა და გარდაცვლილი პაციენტის მეუღლის გადმოყვანა ვერ ხერხდებაო. ეს მართალი არ არის, ჩვენი რეანომობილები მზად არიან, რომ ნებისმიერ წუთს გამოძახებაზე გავიდნენ, მაგრამ ამის საჭიროება არ დგას. ჩვენ მუდმივი კონტაქტი გვაქვს გალის ცენტრალურ საავადმყოფოსთან და საჭიროების შემთხვევაში მზად ვართ, დაშავებულები თბილისში გადმოვიყვანოთ.
მინისტრის ინფორმაციით, გარდაცვლილი პაციენტი ნურა ხასაია ბანკში მუშაობდა, მას ჰიპერტონული კრიზი ჰქონდა, სასწრაფო გამოიძახეს და გალის საავადმყოფოში გადაჰყავდათ, როცა ეს უბედურება დატრიალდა. მეუღლის გარდაცვალების ამბავი დაშავებულმა ქმარმა ჯერ არ იცის, ეს მათი შვილების თხოვნით გაკეთდა.
"კვირის პალიტრა" აზუსტებს, რომ ,,მერსედესის'' დაშავებული მძღოლი ბადრი ყოლბაია ზუგდიდში გადავიდა, თუმცა, ადგილობრივმა საავადმყოფომ პაციენტი არ მიიღო და ქუთაისში გადაიყვანეს. იმავე დღეს ყოლბაია ტრავმატოლოგიურ განყოფილებაში მოათავსეს და ოპერაცია გაუკეთეს. ექიმების თქმით, პაციენტის მდგომარეობა დამაკმაყოფილებელია.