ნაციონალურ მოძრაობის ოფისში გამართულ ბრიფინგზე ზურაბ ჭიაბერაშვილმა გააკეთა განცხადება, რომ პენსიის 50 ლარით გაზრდაა შესაძლებელი.
„არსებულ ვითარებაშიც კი შესაძლებელია, რომ სახელმწიფო დაეხმაროს ყველაზე გაჭირვებულ, ყველაზე მოწყვლად ჯგუფებს. ბიუროკრატიის ხარჯები მნიშვნელოვნად არის გაზრდილი, ხელფასებზე, პრემიებზე, დანამატებზე, ბოლო სამი წლის განმავლობაში 400 მილიონ ლარამდეა დახარჯული. და ამ დროს 420 მილიონი ლარი ჭირდება იმას, რომ 50 ლარით გაიზარდოს პენსია,“ – განაცხადა ზურაბ ჭიაბერაშვილმა.
მისი განცხადებით, დღეს მოქმედი სოციალური პროექტების ნაწილი უსარგებლოა და თანხა არასათანადო მიზნებისთვის იხარჯება.
პენსიის გაზრდის შესაძლებლობაზე, ოღონდ უკვე 2016 წლიდან, კომენტარს აკეთებს ფინანსთა მინისტრის მოადგილე გიორგი კაკაურიძეც. იგი ამ შესაძლებლობას მხოლოდ იმ შემთხვევაში ხედავს, თუ 2016 წლის ბიუჯეტის პროექტით უკვე გაწერილი ზოგიერთი მიმართულებით თანხები შემცირდება.