მომავალ წელს პენსიის გაზრდა არ მოხდება. ყოველ შემთხვევაში, პარლამენტში განსახილველად და დასამტკიცებლად წარდგენილ ბიუჯეტის პროექტში ეს გათვალისწინებული არ არის. ფინანსთა სამინისტრო უარს ამბობს გასულ წელს გაცემული ამ დაპირების შესრულებაზე და მიზეზად ასახელებს ეკონომიკური ვითარების დამძიმებას.
მაგრამ, როგორც ბიუჯეტის პროექტიდან ჩანს, ის, რაც არ არის პენსიების გაზრდისთვის, უხვადაა სახელმწიფო სამსახურში დასაქმებულთა შრომის ანაზღაურების გაზრდისთვის – მომავალ წელს ამისათვის 57 მილიონი ლარით მეტი გამოიყოფა და ეს იმის მიუხედავად, რომ დასაქმებულების რაოდენობამ იკლო.
პენსიონერთა რაოდენობა წელს 40 ათასზე მეტით არის გაზრდილი, რაც დამატებით ხარჯს იწვევს, თუმცა ჩვენ არ იგეგმება რაიმე შეზღუდვების დაწესება ამ მიმართულებით. რაც შეეხება პენსიის გაზრდას – იმ პერიოდში როდესაც ქვეყნის გარშემო არის საკმაოდ რთული ეკონომიკური ვითარება, დამატებით სოციალური ვალდებულებების აღება სწორად არ მიმაჩნია,“ – განაცხადა პარლამენტში ბიუჯეტის წარსადგენად მისულმა ფინანსთა მინისტრის მოადგილემ გიორგი კაკაურიძემ