ფოთში რამდენიმე წუთის წინ ერთ-ერთმა მეთევზემ ვენები გადაიჭრა. იგი სასწრაფო-სამედიცინო დახმარების ბრიგადამ ცენტრალურ კლინიკურ საავადმყოფოში გადაიყვანა. ასევე, მეთევზეებმა ცენტრალური მაგისტრალი გადაკეტეს.
ფოთის ცენტრალური კლინიკური საავადმყოფოს დირექტორის, თეა მიგინეიშვილის ინფორმაციით, მეთევზის მდგომარეობასტაბილურია და მის სიცოცხლეს საფრთხე არ ემუქრება.
“კლინიკაში შემოვიდა 27 წლის მამაკაცი. მას აღენიშნება ნაკვეთი ჭრილობა წინამხრის არეში. პაციენტი მიმღებ დიაგნოსტიკურ განყოფილებაში იმყოფება. მას ყველა საჭირო კვლევა და მკურნალობა უტარდება”, – განაცხადა თეა მიგინეიშვილმა.
ამ ინცინდენტის არალელურად კოლხეთის ეროვნული პარკის ადმინისტრაციულ შენობაში გარემოს დაცვისა და ბუნებრივი რესურსების სამინისტროს წარმომადგენლებთან შეხვედრა მიმდინარეობდა. გარემოს დაცვის სამინისტროს წარმომადგენლის თქმით, ის ფოთში მეთევზეების პრობლემების მოსასმენად და მათი გადაჭრის გზების განსახილველად ჩავიდა. მეთევზეების თქმით, დღევანდელი კანონმდებლობით, პალიასტომის ტბაზე თავისუფალი თევზჭერა და ძრავიანი ნავით გადაადგილება ეზღუდებათ.ისინი კანონში ცვლილებების შეტანას ითხოვენ.
მეთევზეებმა დღეს დილით მალთაყვის უბანში საპროტესტო აქცია გამართეს. მათ პალიასტომის ტბაზე არსებული შეზღუდვები გააპროტესტეს.