ძალადობის წინააღმდეგ მიმართული აქცია თბილისის პარალელურად დღეს ზუგდიდშიც გაიმართა. აქციის მონაწილეებმა გუშინ, 5 ივლისს რადიკალი ძალადობრივი ჯგუფების თარეში და მედიაზე თავდასხმა გააპროტესტეს. აქციაში მონაწილეობდნენ როგორც აქტივისტები, არასამთავრობი სექტორის, ასევე ოპოზიციური პარტიების წარმომადგენლები. მათ ხელში ეჭირათ პლაკატები წარწერებით : „გამოხატვის თავისუფლება დაცულია კონსტიტუციით“, „ყველა ფერი მნიშვნელოვანია“ , „თავისუფალი მედია უდრის დემოკრატიას“.
ცნობისთვის, 5 ივლისს პრაიდის კვირეული თბილისში ღირსების მარშით უნდა დამთავრებულიყო. დილიდან რუსთაველზე შეკრებილმა ძალადობრივმა და ჰომოფობიურმა ჯგუფებმა დაარბიეს პარლამენტის წინ ოპოზიციის მხარდამჭერების კარვები, სცადეს “სირცხვილიას” ოფისში შეჭრა, შეიჭრნენ და დაარბიეს “თბილისი პრაიდის” ოფისი.დღის მანძილზე 50-მდე ჟურნალისტი დაშავდა, მათ შორის რამდენიმე ამ დრომდე სხვადასხვა დაზიანებით საავადმყოფოში რჩება. შსს-მ დღის ბოლოს განაცხადა, რომ ადმინისტრაციული წესით მხოლოდ 8 პირია დაკავებული. 6 ივლისს კი მედიაზე თავდასხმის გამო დამატებით 3 პირი დააკავა. დაკავებული 8 პირიდან ორს სამდღიანი პატიმრობა შეეფარდა, ერთ-ერთი კი 2300 ლარიანი გირაოთი გაათავისუფლეს.