ნახევარსაათიანი ძლიერი სტიქიის შედეგად, სამეგრელოს უდიდეს ნაწილს ელექტრომომარაგება შეუწყდა. ძლიერმა წვიმამ და ქარმა ზუგდიდი-წალენჯიხის ელექტრომაგისტრალი დააზიანა, ხის წაქცევის შედეგად გაწყვეტილია სადენები.
დაზიანებული მაგისტრალის გამო ზუგდიდის ნაწილს, აბაშას, წალენჯიხას, მარტვილსა და ჩხოროწყუს ელექტროენერგია არ მიეწოდება. წალენჯიხაში რამდენიმე ოჯახი ღია ცის ქვეშ დარჩა, ქარმა სახლებს სახურავი ახადა.
გარდა ამისა, ნახევარსაათიანმა ძლიერმა ქარმა და წვიმამ გაანადგურა ნარგავები, ხეხილი და თხილნარი. ადგილობრივები ამბობენ, რომ ნარგავები მინარალური სასუქით უკვე შეწამლული ჰქონდათ და დამატებით მისი ყიდვის საშუალება არ აქვთ, ამიტომ ხელისუფლებას დახმარებას სთხოვენ.
ძლიერი ქარი და ტექნიკისთვის მიუვალი ადგილი აღდგენით სამუშაოებს ართულებს. უცნობია, როდის აღდგება ელექტრომომარაგება.