ზუგდიდის მუნიციპალიტეტის სოფელ ინგირში, მოსახლეობა მეორე წელია უწყლობას უჩივის და გაუსაძლის პირობებში ცხოვრობს. წყალი არ აქვს სკოლას და ბაღს, ახლა მოსახლეობა მხოლოდ წვიმის იმედადაა დარჩენილი, თუმცა სოფელში ჭები ისე დაშრა რომ უკვე ერთკვირიანი წვიმის დროსაც წყალი არ გროვდება. სოფელს არც წყალსადენიდან მიეწოდება წყალი. გარდა უწყლობისა, მოსახლეობას კანალიზაციისა და გზის პრობლემაც აწუხებს.
ადგილობრივები ამბობენ, რომ წყლის დაშრობის მიზეზი არტეზიული ჭების არასწორად დაპროექტებაა. წყლის მილების გაყვანისთვის ადგილობრივმა ხელისუფლებამ 45 მილიონი ლარი დახარჯა, ადგილობრივები ამბობენ, რომ მერიას რამდენჯერმე მიმართეს, თუმცა უშედეგოდ. უწყებაში მოსახლეობას პირდებიან, რომ უწყლობის მოსაგვარებლად სამუშაოები მომავალი თვიდან დაიწყება.