„ერთიანი ნაციონალური მოძრაობა“ რეგიონებში შეხვედრებს აგრძელებს. პარტიის ლიდერმა ნიკა მელიამ დღეს კონსულტაციები ზუგდიდში, პარტიის ოფისში გამართა. რა საკითხები განიხილეს კონკრეტულად შეხვედრაზე, დეტალები მედიისთვის უცნობია. ნიკა მელიამ შეხვედრის დასრულების შემდეგ ჟურნალისტებს განუცხადა, რომ ბევრ მნიშვნელოვან საკითხზე მოხდა შეთანხმება, თუმცა რაც შეეხება მთავარ საკითხს- პარლამენტში შესვლა არშესვლასთან დაკავშირებით, ნიკა მელიას თქმით, კონკრეტული გადაწყვეტილება რეგიონებში შეხვედრების შემდეგ გახდება ცნობილი.
ნიკა მელიამ ჟურნალისტების კითხვებსაც უპასუხა ამნისტიის კანონპროექტთან დაკავშირებით. ერთიანი ნაციონალური მოძრაობის ლიდერმა ხაზგასმით აღნიშნა, რომ „ქართული ოცნება“ და ირაკლი კობახიძე ამნისტიის კანონპროექტზე მის თანხმობას ვერ ეღირსება.
ცნობისთვის, „ქართული ოცნების“ თავმჯდომარის ირაკლი კობახიძის განცხადებით, „ნაციონალური მოძრაობის” თავმჯდომარეს, ნიკა მელიას სურს ამნისტიის შესახებ კანონის მასზე გავრცელება, ოპოზიცია კი მელიას სურვილის წინააღმდეგ მიდის.
როგორც ის განმარტავს, კონსულტაციებზეა დამოკიდებული, შევა თუ არა ამნისტიის შესახებ კანონპროექტში კორექტივები.
.