მომავლის მასწავლებელი – ეს ტიტული ზუგდიდელ ინგლისური ენის სერთიფიცირებულ სპეციალისტს, ლელა ბულიას მიენიჭა. ინგლისური ენის მასწავლებელთა მაღალტექნოლოგიური ონლაინ-სამიტი 2021- სადაც მონაწილეობას მსოფლიოს 30-ზე მეტი ქვეყნის დაახლოებით 30 ათასამდე მონაწილე ღებულობდა, ლელა საქართველოდან ერთადერთი იყო. მან რამდენიმე ტური წარმატებით გადალახა და ფინალურ რეიტინგში პირველი ადგილი დაიკავა.
რაც ყველაზე მნიშვნელოვანია, სამიტის მთავარ მესიჯს მომავლის მასწავლებელთა ტექნოლოგიური მიღწევები წარმოადგენდა, ონლაინ პლატფორმის გამოყენებით მუშაობის უახლესი მეთოდების დანერგვა ყოველდღიურ ცხოვრებაში. ლელა ბულია დღეს უკვე ახალი მეთოდებისა და ხერხების გამოყენებით თავის მოსწავლეებს ამეცადინებს.
ლელას განმარტებით, სამდღიანი სამიტის ღირებულება 90 დოლარს შეადგენდა და მთლიანი თანხა ინდოეთში ქველმოქმედების ფარგლებში სიღარიბის ზღვარს მიღმა მყოფი ოჯახებისთვის, განათლებისთვისა და სამედიცინო სფეროსთვის გადაირიცხა.
მას ასევე ეძლევა შანსი, აღნიშნულ სამიტს მომავალ წელსაც დაესწროს და ტრენინგები განათლების სფეროში უახლესი ცვლილებების შესახებ გაიაროს.