გარევაჭრობისთვის განკუთვნილი უნებართვო კონსტრუქციები აიღეს თბილისის მერიის ზედამხედველობის საქალაქო სამსახურის წარმომადგენლებმა მეტრო ვარკეთილის მიმდებარე
ტერიტორიაზე. ადგილი თბილსერვის ჯგუფმა დაასუფთავა.
მერიის ზედამხედველობის საქალაქო სამსახურში აცხადებენ, რომ მეტრო ,,ვარკეთილთან'' მოვაჭრეები რამდენჯერმე გააფრთხილეს, შეეწყვიტათ უნებართვო საქმიანობა.
თავის მხრივ, მოვაჭრეები აპირებენ შეუერთდნენ გამაფრთხილებელ აქციას თბილისის მერიასთან, რომელსაც გუშინ ნავთლუღის ბაზრის ტერიტორიაზე გამართული აქციის მონაწილეები გეგმავენ.
გუშინდელ აქციაზე გარემოვაჭრეებსა და ადგილობრივ მოვაჭრეებს შორის სიტყვიერი დაპირისპირებაც მოხდა, რაც შეეხება მათი პროტესტის ადრესატს – თბილისის მერიას, დავით ნარმანიას თქმით, ისინიც სხვა გარემოვაჭრეების მსგავსად, 6 თვის განმავლობაში გადასახადებისგან გათავისუფლდებიან. თუმცა, მოვაჭრეები ნახევარწლიან ვადას გარევაჭრობისთვის ითხოვენ.
„ქალაქი და მოსახლეობის აბსოლუტური უმრავლესობა ითხოვს ჩვენგან, რომ საჯარო სარგებლობის სივრცეები იქნას გათავისუფლებული, დავიცვათ კანონები, წესები. მაგრამ მეორეს მხრივ, შევდივართ ამ ადამიანების მდგომარეობაში. სწორედ ამიტომ, ბაზრობების ადმინისტრაციების მოლაპარაკების საფუძველზე, ისინი 6 თვის განმავლობაში გათავისუფლებული იქნებიან შესაბამისი მოსაკრებლის გადახდისგან," – განმარტა დავით ნარმანიამ.