დღეს ნაციონალური მოძრაობა ბიუროს სხდომაზე კიდევ ერთხელ დააყენებს დროებითი საგამოძიებო კომისიის შექმნის საკითხს გაზპრომის თემაზე . საკითხის განხილვა გასულ კვირას იგეგმებოდა, თუმცა ვერ მოხერხდა.
„ჩვენი შიშები ამოჩნდა სწორი, სწორად ვითხოვდით დროებითი საგამოძიებო კომისიის შექმნას. ვინაიდან, გუშინწინ პარლამენტში მოვისმინეთ სემეკის ანგარიში, სადაც აღმოჩნდა, რომ 2016 წელს 2015 წელთან შედარებით გაზის მოხმარება შემცირდა 6.4%-ით. ამან გამოიწვია სწორედ გაზპრომთან ეკონომიკურად, პოლიტიკურად და ფინანსურად წამგებიანი ხელშეკრულების გაფორმება,“ – აცხადებს რომან გოცირიძე.
საპარალმენტო უმცირესობა კი აქცენტს ბიზნეს ლიბერალიზაციასთან დაკავშირებით ინიციატივაზე გააკეთებს. პარლამენტის ფრაქცია ,,მოძრაობა თავისუფლებისთვის – რეგიონების'' წევრის ზურაბ ჭიაბერაშვილის განმარტებით, კანონპროექტის მიხედვით, პირველად ჩადენილ ეკონომიკურ დანაშაულზე, თუ დანაშაულის მასშტაბი განსაკუთრებით დიდი ოდენობის არაა, სასჯელი იქნება ჯარიმა ან გამოსასწორებელი სამუშაო.
იზრდება ზღვრებიც, რომლის ზემოთაც იწყება ბიზნესის სისხლის სამართლის პასუხისმგებლობა.