,,მთავრობის მიერ მომზადებული კანონპროექტი სიტყვასიტყვით იმეორებს იმას, რაც მმართველ გუნდს შევთავაზეთ. ეს არის ზუსტი ასლი, ოღონდ იმ განსხვავებით, რომ თუკი ჩვენ სისხლის სამართლის პასუხისმგებლობის ზღვარის  500 000 ლარამდე აწევისთვის ვიბრძოდით, მთავრობამ კი მხოლოდ 100 000 ლარამდე ასწია. ამასთან გვინდა 500 000 ლარამდე ოდენობის გადასახადის გადახდისგან თავის არიდებაზე სუბიექტი მხოლოდ ადმინისტრაციული წესით დაისაჯოს და დაჯარიმდეს, მაგრამ არა უშავს, ესეც კარგია და შეესაბამება ქართული ანდაზის პრინციპს – „ყვავს კაკალი გააგდებინეო“. – ასე აფასებს  საპარლამენტო ფრაქცია ”ნაციონალური მოძრაობის” თავმჯდომარე რომან გოცირიძე   მთავრობის საკანონმდებლო ინიციატივას, რომელიც გადასახადისაგან თავის არიდებაზე სისხლის სამართლის პასუხისმგებლობის შემსუბუქებას ისახავს მიზნად.

 

მისი თქმით, ეს  ოპოზიციის შრომის შედეგია და მოწმობს, რომ მას  შეუძლია ხელისუფლებას ჯანსაღი იდეები მოახვიოს თავს''. 

 

დღეს პარლამენტის საფინანსო-საბიუჯეტო კომიტეტი „ნაციონალური მოძრაობის“ მიერ ინიცირებულ საკანონმდებლო პაკეტს იხილავს, რომელიც შვიდი კანონპროექტისგან შედგება. აქედან 6 საკანონმდებლო ინიციატივა მცირე და საშუალო ბიზნესის ხელშეწყობას ითვალისწინებს, ხოლო ერთი ინიციატივა გადასახადისგან თავის არიდებაზე ზღვარის გაზრდას ისახავს მიზნად. ”ნაციონალური მოძრაობის” ინიციატივის გათვალისწინებით ასეთ შემთხვევაში პირს პასუხისმგებლობა მაშინ დაეკისრება, თუკი თანხა 500 000 ლარს აღემატება. აქამდე ეს ზღვარი 10 ათასი ლარი იყო.