ზუგდიდის მუნიციპალიტეტის გამგებლის წარმომადგენელი შამგონის ტერიტორიულ ერთეულში ადგილობრივ მოსახლეობას ლოცვის გაძლიერებისკენ და სიმშვიდისკენ მოუწოდებს. ამის შესახებ მან ცოტა ხნის წინ ჟურნალისტებთან სოფელ შამგონაში ბოლო დღეებში მიმდინარე უჩვეულო ფაქტთან დაკავშირებით კომენტირებისას განაცხადა. დემნა ხუბუას განცხადებით, სოფელში არანაირი იდუმალი არსება არ არსებობს და მოსახლეობას ეს "ყველაფერი ეჩვენება".
"ამ ფაქტს არავინ არ ადასტურებს და ჩემი აზრით ეჩვენებათ ეს ყველაფერი. საუბარი მქონდა მოსახლეობასთან და ვერავინ ვერ ადასტურებს ამ ფაქტს. მსგავსი ფაქტი მე პირადად არ მინახია. რამე რომ ხდებოდეს, ხომ უნდა იყოს ფაქტი?! ასეთი ფაქტი არ არსებობს. მე ვიყავი იმ ოჯახში, მქონდა საუბარი, თუმცა ბოლომდე ვერ ადასტურებენ ამას. ყველას მოვუწოდებ სიმშვიდისკენ, ახლა გამოსავალი სიმშვიდე და ლოცვაა. უნდა გავაძლიეროთ ლოცვა. ეს არის პანიკა, ვიღაცამ ააგორა ეს ყველაფერი" – ამბობს ჟურნალისტებთან საუბრისას ზუგდიდის მუნიციპალიტეტის გამგებლის წარმომადგენელი შამგონის ტერიტორიულ ერთეულში დემნა ხუბუა.
შეგახსენებთ, რომ სოფელ შამგონის მოსახლეობა სოფელში იდუმალი არსების არსებობაზე საუბრობს, რომელიც ღამღამობით ადგილობრივების სახლებში დადის, აკაკუნებს კარებზე, ფანჯრებზე, გამოსცემს არაადამიანურ ხმებს, რაც შიშს იწვევს ადგილობრივ მოსახლეობაში. შამგონის მოსახლეობა ამბობს, რომ მიუხედავად ადგილობრივების მცდელობისა, მისი შეპყრობა ვერავინ შეძლო. ერთ-ერთი შამგონელის თქმით, მან პირადად ნახა ამოუცნობი არსება, რომელსაც სახე სანახევროდ ჰქონდა დაფარული. მისივე განცხადებით, მას ახალგაზრდა მამაკაცის აღნაგობა ჰქონდა.