თავდამსხმელი, რომელიც წერეთლის გამზირზე მდებარე მიკროსაფინანსო ორგანიზაციაში შეიჭრა, დაკავებულია.
გათავისუფლებულია ყველა მძევალი. ამის შესახებ ინფორმაციას შსს ადასტურებს.
შეგახსენებთ, თბილისში, წერეთლის გამზირზე მდებარე მიკროსაფინანსო ორგანიზაციაში „ემ – ბი – სი“ რამდენიმე საათის წინ, დაახლოებით 17:00 საათისთვის თავდამსხმელი შეიჭრა და 9 მძევალი აიყვანა. მან მოითხოვა აიკრძალოს აზარტული თამაშები, საბანკო სესხებზე დაწესდეს 7%-იანი წლიური პროცენტი და გაიაფდეს წამლები.
მიკროსაფინანსო ორგანიზაციაში შეჭრილი პირი ლევან ზურაბაშვილია, რომელიც, როგორც ფეისბუქზე მითითებული ინფორმაციიდან ირკვევა, ბორჯომიდან არის.
ამჟამად თბილისში ორხევის დასახლებაში ცხოვრობს.
როგორც მისმა მეზობლებმა განაცხადეს, ზურაბაშვილს ჰყავს ერთი მცირეწლოვანი შვილი, მეუღლეს კი რამდენიმე ხნის წინ დაშორდა.
„სახლში ჰყავს დედა, თვითონ ხშირად სვამს, თორემ ისე გადასარევი ბიჭია. როგორც ვიცი თამაშობდა, ერთი სახლი ამის გამო ბანკმა გაუყიდა და ახლა ეს სახლიც ბანკშია ჩადებული და დედამისი ქუჩაში რჩება”, – ამბობს თავდამსხმელის მეზობელი.
ლევან ზურაბაშვილის ფოტოები ამოკრებილია მისი პირადი ფეისბუქგვერდიდან