საზღვრისპირა სოფელ რუხში მდინარე ენგურზე ბოლო ერთი თვის განმავლობაში ორი ადამიანი შემოვლითი გზით გადაცურვის დროს დაიხრჩო. 65 წლის ოთარ ჯობავა და 55 წლის ბესიკ რატია მდინარე ენგურის „ჩუმად“ გადაცურვით ცდილობდნენ დანარჩენ საქართველოში მოხვედრას.
სახიფათო გზას ხიდის ჩაკეტვის დროს ენგურს გაღმა მცხოვრები ქართველები სწორედ ამ მონაკვეთის გავლით სხვადასხვა მეთოდებითა და ხერხებით ცდილობენ, რომელიც სიცოცხლისთვის საფრთხეს წარმოადგენს.
კონფლიქტოლოგი პაატა ზაქარეიშვილი ჩვენთან სატელეფონო საუბარში ოკუპირებულ აფხაზეთში ბოლო პერიოდში განვითარებულ მოვლენებს აფასებს და აცხადებს, რომ კონფლიქტის შედეგად ორად გახლეჩილ მხარეებს შორის პირველ რიგში მოლაპარაკებები უნდა აღდგეს.
მისივე თქმით, ამ ეტაპზე ქართული მხარე წინასაარჩევნო პროცესებშია ჩართული და ვერ ახერხებს ენგურს გაღმა შექმნილ პრობლემებზე ყურადღების გამახვილებას. ზაქარეიშვილის განმარტებითვე, ქართულ მხარეს მართებს გონივრულობა და პრაგმატულობა, რომ დროულად მოგვარდეს ჰუმანიტარული კრიზისი, რომლის წინაშეც ოკუპირებულ აფხაზეთში მცხოვრები ქართველი მოსახლეობა იმყოფება.