ზუგდიდის ინფექციურ საავადმყოფოში სამეგრელო-ზემო სვანეთის მასშტაბით  გამოკვლეული ნიმუშებიდან კორონავირუსის ცხრა შემთხვევა დადასტურდა. სამეგრელო-ზემო სვანეთის რეგიონის რწმუნებულის მოვალეობის შემსრულებლის, მალხაზ თორიას განცხადებით, ცხრა ინფიცირებულიდან  ერთი  ოკუპირებულ აფხაზეთს, კერძოდ, სოფელ საბერიოს კლასტერს მიეკუთვნება, ოთხი  პირიც ოკუპირებული ტერიტორიიდან არის გადმოყვანილი, რომლებიც  საკარანტინო ზონაში იმყოფებოდნენ.

ზუგდიდის ინფექციურ საავადმყოფოში გასული დღე-ღამის განმავლობაში რეგიონში 691 პირს ჩაუტარდა კორონავირუსზე ტესტირება. საიდანაც  500 ტესტის პასუხია ცნობილი, დანარჩენის პასუხი კი დღის ბოლოსთვის იქნება ცნობილი.  491 ნიმუშის პასუხი კორონავირუსზე უარყოფითია, ცხრა  კი დადებითი.

ამასთანავე, ანაკლია-განმუხურის საკარანტინე სივრცეში 123 ადამიანი რჩება. ხოლო  რუხის საავადმყოფოში ამ დროისთვის 60 კოვიდინფიცირებული პაციენტი მკურნალობს, მათგან 10 გამოჯანმრთელდა და ისინი კლინიკას დღეს დატოვებენ.