პროექტ „დიაბეტის გართულებების ადრეული პრევენციის და მართვის გაუმჯობესების ხელშეწყობის“ განმახორციელებლმა გუნდმა სამეგრელოს რეგიონში გამართა პირველი გასვლითი შეხვედრა. კერძოდ, პროექტის გუნდი ესტუმრა რეაბილიტაციისა და განვითარების საქველმოქმედო ცენტრ „თანაზიარს“, რომელიც შერჩეულ იქნა პარტნიორად სამეგრელოს რეგიონში. პროექტის მიზანია დიაბეტის ადრეული დიაგნოსტიკისა და პაციენტზე ზრუნვის გაუმჯობესების ხელშეწყობა.
ვიზიტის ფარგლებში, „თანაზიარის“ სამედიცინო ცენტრს გადაეცემა აღჭურვილობა, რომელიც ხელს შეუწყობს დიაბეტით გამოწვეული თვალის დაავადებების მქონე პაციენტების უკეთეს დიაგნოსტიკასა და მკურნალობას. დიაბეტისა და თვალის დაავადებების მქონე პაციენტებს ჩაუტარდათ უფასო გამოკვლევები და მიეცათ შესაბამისი დანიშნულებები. აღნიშნული პროექტი დაფინანსებულია „დიაბეტის მსოფლიო ფონდისა“ და „ლაიონს ქლაბს ინთერნეიშენელის“ მიერ.