ქალაქ ზუგდიდის საკრებულოს დღევანდელ სხდომაზე სხვა საკითხებისგან განსხვავებით აზრთა სხვადასხვაობა გამოიწვია ქალაქის მერიის ინიცირებულმა პროექტმა სტრუქტურული ცვლილების შესახებ. პროექტის თანახმად, მერიაში ცალკე იქმნება ქალაქთმშენებლობის სამსახური, რომელიც უწყების ეკონომიკისა და ინფრასტრუქტურის სამსახურს გამოეყოფა. აღნიშნული პროექტი დეპუტატების განცხადებით, გამოიწვევს მთელ რიგ ცლილებებს, მათ შორის გაიზრდება საშტატო ერთეული უწყებაში. შემოთავაზებულ პროექტს საკრებულოს წევრთა უმრავლესობამ მხარი დაუჭირა, წინააღმდეგი მხოლოდ ფრაქცია ერთიანი ნაციონალური მოძრაობის დეპუტატები იყვნენ. ფრაქციის წევრების განცხადებით, ქვეყანაში შექმნილი მძიმე სოციალურ-ეკონომიკური ფონის გათვალისწინებით, უხერხულია ახალი სამსახურის შექმნა და საშტატო ერთეულის გაზრდა.
საკრებულოს იურიდიული კომისიის თავმჯდომარის ნუგზარ სარიას განმარტებით, მოხდა აღნიშნული პროექტის ადმინისტრაციულ წარმოებაში მიღება. თუმცა მის მნიშვნელობაზე და აუცილებლობაზე განმარტებები მერიის შესაბამისმა სამსახურებმა საქმის შესწავლის შემდეგ უნდა გააკეთონ.
საკრებულოს უმცირესობის აზრით, ქალაქის მერიაში ისედაც გაზრდილია საშტატო ერთეულები, ამიტომაც დამატებითი ხარჯების გაწევა არამიზნობრივია. ცნობისათვის, მერიის სამსახურების უფროსების თანამდებობრივი სარგო 2000 ლარით განისაზღვრება. 1500 ლარს შეადგენს განყოფილების უფროსის თვიური ანაზღაურება. ხოლო რაც შეეხება სამსახურის მთავარ სპეციალისტს და სპეციალისტს – მათი ხელფასი 900-დან 1000 ლარამდე განისაზღვრება